kahin zamin kahin aasman chhoD aae

kahīñ zamīn kahīñ āsmān chhoḌ aa.e

dayār-karb meñ apnā makān chhoḌ aa.e

na.e safar pe na.e mausamoñ ne dī āvāz

kaḌī thī dhuup magar sā.ebān chhoḌ aa.e

ye jaan kar bhī ki nā-mehrbāniyāñ hoñgī

purāne shahr meñ sab mehrbān chhoḌ aa.e

talātum-e-ġham-e-daurāñ meñ bah ga.e patvār

havā ke haath meñ ham bādbān chhoḌ aa.e

jahāñ se izn-e-takallum kabhī nahīñ miltā

vahīñ pe apnī darīda zabān chhoḌ aa.e

hameñ patā thā ki mojiz-bayāniyāñ hoñgī

zabān-e-ḳhalq magar bad-gumān chhoḌ aa.e

jahāñ kisī ko bhī apnā patā nahīñ miltā

vajūd-e-'nūr' vahīñ be-nishān chhoḌ aa.e

kahin zamin kahin aasman chhoD aae

dayar-karb mein apna makan chhoD aae

nae safar pe nae mausamon ne di aawaz

kaDi thi dhup magar saeban chhoD aae

ye jaan kar bhi ki na-mehrbaniyan hongi

purane shahr mein sab mehrban chhoD aae

talatum-e-gham-e-dauran mein bah gae patwar

hawa ke hath mein hum baadban chhoD aae

jahan se izn-e-takallum kabhi nahin milta

wahin pe apni darida zaban chhoD aae

hamein pata tha ki mojiz-bayaniyan hongi

zaban-e-KHalq magar bad-guman chhoD aae

jahan kisi ko bhi apna pata nahin milta

wajud-e-'nur' wahin be-nishan chhoD aae