kahiye gar rabt muddai se hai

kahiye gar rabt mudda.ī se hai

kahte haiñ dostī tujhī se hai

dekhiye aage aage kyā kuchh ho

dil kī harkat ye kuchh abhī se hai

us kī ulfat meñ jīte-jī marnā

fā.eda ye bhī zindagī se hai

zid hai gar hai to ho sabhī ke saath

yā na milne kī zid mujhī se hai

ḳhauf se tum se kah nahīñ sakte

dil meñ ik aarzū kabhī se hai

mujh se pūchho ho kis se ulfat hai

tum samajhte nahīñ kisī se hai

ranjish-e-ġhair se nahīñ matlab

kaam ham ko tirī ḳhushī se hai

is qadar aap ham pe zulm kareñ

is kā insāf aap hī se hai

rashk dushman na sah sakegā 'nizām'

ye bhī nā-chār apne jī se hai

kahiye gar rabt muddai se hai

kahte hain dosti tujhi se hai

dekhiye aage aage kya kuchh ho

dil ki harkat ye kuchh abhi se hai

us ki ulfat mein jite-ji marna

faeda ye bhi zindagi se hai

zid hai gar hai to ho sabhi ke sath

ya na milne ki zid mujhi se hai

KHauf se tum se kah nahin sakte

dil mein ek aarzu kabhi se hai

mujh se puchho ho kis se ulfat hai

tum samajhte nahin kisi se hai

ranjish-e-ghair se nahin matlab

kaam hum ko teri KHushi se hai

is qadar aap hum pe zulm karen

is ka insaf aap hi se hai

rashk dushman na sah sakega 'nizam'

ye bhi na-chaar apne ji se hai