kahne lagi hai mujhse hawa kuchh hua to hai

kahne lagī hai mujh se havā kuchh huā to hai

sunñe meñ aa rahī hai sadā kuchh huā to hai

mahsūs kar rahā huuñ zamīñ kī namī ko maiñ

din raat ro rahī hai havā kuchh huā to hai

laḌkī uThā ke haath falak dekhne lagī

rūThā huā hai kyā ye ḳhudā kuchh huā to hai

mad.hosh ho rahā huuñ badan ko sambhāl tū

kyā aa rahī hai koī qazā kuchh huā to hai

mujh ko nikalnā aaj mere jism se paḌā

maiñ hī havā huuñ mujh se judā kuchh huā to hai

kaliyāñ sisak ke rone lagī chāñd raat meñ

aur peḌ de rahā hai sadā kuchh huā to hai

rotā huā jo dekhā use dasht-gāh meñ

tanhā.iyoñ ne mujh se kahā kuchh huā to hai

murshid hī jāntā hai ke kyā hādsa huā

murshid hī ne ye mujh se kahā kuchh huā to hai

mujh ko paḌā milā hai vo majdhār meñ to phir

paanī pe hai ye kis ne likhā kuchh huā to hai

koī nahīñ thā jo kī sune us kī baat ko

āḳhir vo boltā hī rahā kuchh huā to hai

āvāz aa rahī hai koī chīḳhtī huī

'arpit' nikal ke dekh zarā kuchh huā to hai

kahne lagi hai mujh se hawa kuchh hua to hai

sunne mein aa rahi hai sada kuchh hua to hai

mahsus kar raha hun zamin ki nami ko main

din raat ro rahi hai hawa kuchh hua to hai

laDki uTha ke hath falak dekhne lagi

ruTha hua hai kya ye KHuda kuchh hua to hai

madhosh ho raha hun badan ko sambhaal tu

kya aa rahi hai koi qaza kuchh hua to hai

mujh ko nikalna aaj mere jism se paDa

main hi hawa hun mujh se juda kuchh hua to hai

kaliyan sisak ke rone lagi chand raat mein

aur peD de raha hai sada kuchh hua to hai

rota hua jo dekha use dasht-gah mein

tanhaiyon ne mujh se kaha kuchh hua to hai

murshid hi jaanta hai ke kya hadsa hua

murshid hi ne ye mujh se kaha kuchh hua to hai

mujh ko paDa mila hai wo majdhaar mein to phir

pani pe hai ye kis ne likha kuchh hua to hai

koi nahin tha jo ki sune us ki baat ko

aaKHir wo bolta hi raha kuchh hua to hai

aawaz aa rahi hai koi chiKHti hui

'arpit' nikal ke dekh zara kuchh hua to hai