kahne sunne ka ajab donon taraf josh raha

kahne sunñe kā ajab donoñ taraf josh rahā

shahr kī bātoñ pe sahrā hama-tan-gosh rahā

āñkhoñ āñkhoñ meñ vazāhat se huā kiiñ bāteñ

chup na mahfil meñ vo baiThā na maiñ ḳhāmosh rahā

rakh diyā vaqt ne ā.īna banā kar mujh ko

rū-ba-rū hote hue bhī maiñ farāmosh rahā

muddatoñ ba.ad naqāb us ne uThā.ī ruḳh se

sar-ba-sar sho.ala vo niklā jo siyah-posh rahā

Thahrā iz.hār kī hasrat ko chhupānā mushkil

ban gayā boltī tasvīr jo ḳhāmosh rahā

dhuup kī thī jahāñ fasloñ ko zarūrat 'rāhī'

bādaloñ meñ vahīñ sūraj kahīñ rū-posh rahā

kahne sunne ka ajab donon taraf josh raha

shahr ki baaton pe sahra hama-tan-gosh raha

aankhon aankhon mein wazahat se hua kin baaten

chup na mahfil mein wo baiTha na main KHamosh raha

rakh diya waqt ne aaina bana kar mujh ko

ru-ba-ru hote hue bhi main faramosh raha

muddaton baad naqab us ne uThai ruKH se

sar-ba-sar shoala wo nikla jo siyah-posh raha

Thahra izhaar ki hasrat ko chhupana mushkil

ban gaya bolti taswir jo KHamosh raha

dhup ki thi jahan faslon ko zarurat 'rahi'

baadalon mein wahin suraj kahin ru-posh raha