kahta hai kaun sang-o-shajar bolte nahin

kahtā hai kaun sang-o-shajar bolte nahīñ

vo bolte haiñ jab to bashar bolte nahīñ

ta.amīl-e-hukm-e-rab meñ haiñ masrūf rāt-din

is vāste ye shams-o-qamar bolte nahīñ

gaañv ke zarre zarre meñ hai shor-o-ġhul magar

bāzār chup hai aur nagar bolte nahīñ

pal pal kī hai ḳhabar inheñ phir bhī na jaane kyoñ

dīvār be-zabān hai dar bolte nahīñ

paḌhte rahe darūd hai dasht-e-arab gavāh

ye baat hai ġhalat ki hajar bolte nahīñ

be-jān se bhī hote haiñ vo mahv-e-guftugū

kyā jaane mujh se kyoñ vo magar bolte nahīñ

qatroñ ko roz dete haiñ ye dars-e-ijtihād

phir kaise maan luuñ ki guhar bolte nahīñ

kahta hai kaun sang-o-shajar bolte nahin

wo bolte hain jab to bashar bolte nahin

tamil-e-hukm-e-rab mein hain masruf raat-din

is waste ye shams-o-qamar bolte nahin

ganw ke zarre zarre mein hai shor-o-ghul magar

bazar chup hai aur nagar bolte nahin

pal pal ki hai KHabar inhen phir bhi na jaane kyon

diwar be-zaban hai dar bolte nahin

paDhte rahe darud hai dasht-e-arab gawah

ye baat hai ghalat ki hajar bolte nahin

be-jaan se bhi hote hain wo mahw-e-guftugu

kya jaane mujh se kyon wo magar bolte nahin

qatron ko roz dete hain ye dars-e-ijtihad

phir kaise man lun ki guhar bolte nahin