kahta hai na dil us but-e-be-pir se uljha

kahtā hai na dil us but-e-be-pīr se uljhā

nāseh mirā dil is tirī taqrīr se uljhā

dil yaar kī jo zulf-e-girah-gīr se uljhā

saudā.ī thā achchhā huā zanjīr se uljhā

zanjīra-e-har-satr hai zanjīr ke mānind

dil nāma-e-dildār kī tahrīr se uljhā

abrū kī mohabbat nahīñ achchhī kabhī ai dil

vo qatl huā saaf jo shamshīr se uljhā

koThe pe khaḌe baal sukhāte haiñ vo yā'nī

liije dil-e-ālam isī tadbīr se uljhā

dil hai jo giraftār tirī chīn-e-jabīñ kā

is daam meñ maiñ ḳhūbī-e-taqdīr se uljhā

saffāk zarā kījiyo to is ko samajh kar

ik tār-e-rag-e-jāñ hai tire tiir se uljhā

bālā-e-falak maah se haale pe paḌī os

haala jo kalī kī tirī zanjīr se uljhā

sad-chāk huā yaañ dil-e-sauda-zada apnā

shāna jo vahāñ zulf-e-girah-gīr se uljhā

sad-shukr ḳhudā haath rakhā dosh pe mere

jab pā.icha pā-e-but-e-be-pīr se uljhā

'daula' tū vo hai saaf chhuTā ḳhalq-e-ḳhudā se

ik rishta-e-aḳhlāq-e-jahāñgīr se uljhā

kahta hai na dil us but-e-be-pir se uljha

naseh mera dil is teri taqrir se uljha

dil yar ki jo zulf-e-girah-gir se uljha

saudai tha achchha hua zanjir se uljha

zanjira-e-har-satr hai zanjir ke manind

dil nama-e-dildar ki tahrir se uljha

abru ki mohabbat nahin achchhi kabhi ai dil

wo qatl hua saf jo shamshir se uljha

koThe pe khaDe baal sukhate hain wo ya'ni

lije dil-e-alam isi tadbir se uljha

dil hai jo giraftar teri chin-e-jabin ka

is dam mein main KHubi-e-taqdir se uljha

saffak zara kijiyo to is ko samajh kar

ek tar-e-rag-e-jaan hai tere tir se uljha

baala-e-falak mah se haale pe paDi os

haala jo kali ki teri zanjir se uljha

sad-chaak hua yan dil-e-sauda-zada apna

shana jo wahan zulf-e-girah-gir se uljha

sad-shukr KHuda hath rakha dosh pe mere

jab paicha pa-e-but-e-be-pir se uljha

'daula' tu wo hai saf chhuTa KHalq-e-KHuda se

ek rishta-e-aKHlaq-e-jahangir se uljha