kahte hain bahaar aai gul phul nikalte hain

kahte haiñ bahār aa.ī gul phuul nikalte haiñ

ham kunj-e-qafas meñ haiñ dil sīnoñ meñ jalte haiñ

ab ek sī be-hoshī rahtī nahīñ hai ham ko

kuchh dil bhī sambhalte haiñ par der sambhalte haiñ

vo to nahīñ ik chhīñTā rone kā huā gaahe

ab dīda-e-tar aksar dariyā se ubalte haiñ

un paañv ko āñkhoñ se ham malte rahe jaisā

afsos se hāthoñ ko ab vaisā hī malte haiñ

kyā kahiye ki a.azā sab paanī hue haiñ apne

ham ātish-e-hijrāñ meñ yuuñ hī paḌe galte haiñ

karte haiñ sifat jab ham lāl-e-lab-e-jānāñ kī

tab koī hameñ dekhe kyā la.al ugalte haiñ

gul phuul se bhī apne dil to nahīñ lagte Tuk

jī logoñ ke be-jānāñ kis taur bahalte haiñ

haiñ narm sanam go na kahne ke ta.iiñ varna

patthar haiñ unhoñ ke dil kaahe ko pighalte haiñ

ai garm-e-safar yārāñ jo hai so sar-e-rah hai

jo rah sako rah jaao ab 'mīr' bhī chalte haiñ

kahte hain bahaar aai gul phul nikalte hain

hum kunj-e-qafas mein hain dil sinon mein jalte hain

ab ek si be-hoshi rahti nahin hai hum ko

kuchh dil bhi sambhalte hain par der sambhalte hain

wo to nahin ek chhinTa rone ka hua gahe

ab dida-e-tar aksar dariya se ubalte hain

un panw ko aankhon se hum malte rahe jaisa

afsos se hathon ko ab waisa hi malte hain

kya kahiye ki aaza sab pani hue hain apne

hum aatish-e-hijran mein yun hi paDe galte hain

karte hain sifat jab hum lal-e-lab-e-jaanan ki

tab koi hamein dekhe kya lal ugalte hain

gul phul se bhi apne dil to nahin lagte Tuk

ji logon ke be-jaanan kis taur bahalte hain

hain narm sanam go na kahne ke tain warna

patthar hain unhon ke dil kahe ko pighalte hain

ai garm-e-safar yaran jo hai so sar-e-rah hai

jo rah sako rah jao ab 'mir' bhi chalte hain