kahte hain jis ko nazir suniye Tuk us ka bayan

kahte haiñ jis ko 'nazīr' suniye Tuk us kā bayāñ

thā vo moallim ġharīb buzdil o tarsanda-jāñ

koī kitāb is ke ta.iiñ saaf na thī dars kī

aa.e to ma.anī kahe varna paḌhā.ī ravāñ

fahm na thā ilm se kuchh arabī ke use

fārsī meñ haañ magar samjhe thā kuchh iin o aañ

likhne kī ye tarz thī kuchh jo likhe thā kabhī

puḳhtagī o ḳhāmī ke us kā thā ḳhat darmiyāñ

sher o ġhazal ke sivā shauq na thā kuchh use

apne isī shaġhl meñ rahtā thā ḳhush har zamāñ

sust ravish past qad sāñvlā hindī-nazhād

tan bhī kuchh aisā hī thā qad ke muāfiq ayaañ

māthe pe ik ḳhaal thā chhoTā sā masse ke taur

thā vo paḌā aan kar abruoñ ke darmiyāñ

vaz.a subuk us kī thī tis pe na rakhtā thā riish

mūchhaiñ thiiñ aur kānoñ par paTTe bhī the pumba-sāñ

piirī meñ jaisī ki thī us ko dil-afsurdagī

vaisī hī rahī thī un dinoñ jin dinoñ maiñ thā javāñ

jitne ġharaz kaam haiñ aur paḌhāne sivā

chāhiye kuchh us se hoñ utnī liyāqat kahāñ

fazl ne allāh ke us ko diyā umr bhar

izzat-o-hurmat ke saath pārcha o āb-o-nāñ

kahte hain jis ko 'nazir' suniye Tuk us ka bayan

tha wo moallim gharib buzdil o tarsanda-jaan

koi kitab is ke tain saf na thi dars ki

aae to mani kahe warna paDhai rawan

fahm na tha ilm se kuchh arabi ke use

farsi mein han magar samjhe tha kuchh in o aan

likhne ki ye tarz thi kuchh jo likhe tha kabhi

puKHtagi o KHami ke us ka tha KHat darmiyan

sher o ghazal ke siwa shauq na tha kuchh use

apne isi shaghl mein rahta tha KHush har zaman

sust rawish past qad sanwla hindi-nazhad

tan bhi kuchh aisa hi tha qad ke muafiq ayan

mathe pe ek KHal tha chhoTa sa masse ke taur

tha wo paDa aan kar abruon ke darmiyan

waza subuk us ki thi tis pe na rakhta tha rish

muchhain thin aur kanon par paTTe bhi the pumba-san

piri mein jaisi ki thi us ko dil-afsurdagi

waisi hi rahi thi un dinon jin dinon main tha jawan

jitne gharaz kaam hain aur paDhane siwa

chahiye kuchh us se hon utni liyaqat kahan

fazl ne allah ke us ko diya umr bhar

izzat-o-hurmat ke sath parcha o aab-o-nan