kahte hain ki ab humse KHata-kar bahut hain

kahte haiñ ki ab ham se ḳhatā-kār bahut haiñ

ik rasm-e-vafā thī so vafādār bahut haiñ

lahje kī khanak ho ki nigāhoñ kī sadāqat

yūsuf ke liye misr ke bāzār bahut haiñ

kuchh zaḳhm kī rañgat meñ gul-e-tar ke qarīñ the

kuchh naqsh ki haiñ naqsh-ba-dīvār bahut haiñ

rāhoñ meñ koī ābla-pā ab nahīñ miltā

raste meñ magar qāfila-sālār bahut haiñ

ik ḳhvāb kā ehsāñ bhī uThā.e nahīñ uThtā

kyā kahiye ki āsūda-e-āzār bahut haiñ

kyuuñ ahl-e-vafā zahmat-e-bedād-nigāhī

jiine ke liye aur bhī āzār bahut haiñ

har jazba-e-betāb ke ahkām hazāroñ

har lamha-e-be-ḳhvāb ke isrār bahut haiñ

palkoñ talak aa pahuñche na kirnoñ kī tamāzat

ab tak to 'adā' ā.ina-bardār bahut haiñ

kahte hain ki ab hum se KHata-kar bahut hain

ek rasm-e-wafa thi so wafadar bahut hain

lahje ki khanak ho ki nigahon ki sadaqat

yusuf ke liye misr ke bazar bahut hain

kuchh zaKHm ki rangat mein gul-e-tar ke qarin the

kuchh naqsh ki hain naqsh-ba-diwar bahut hain

rahon mein koi aabla-pa ab nahin milta

raste mein magar qafila-salar bahut hain

ek KHwab ka ehsan bhi uThae nahin uThta

kya kahiye ki aasuda-e-azar bahut hain

kyun ahl-e-wafa zahmat-e-bedad-nigahi

jine ke liye aur bhi aazar bahut hain

har jazba-e-betab ke ahkaam hazaron

har lamha-e-be-KHwab ke israr bahut hain

palkon talak aa pahunche na kirnon ki tamazat

ab tak to 'ada' aaina-bardar bahut hain