kahun dost se dost ki baat kya kya

kahūñ dost se dost kī baat kyā kyā

rahī dushmanoñ se mulāqāt kyā kyā

vo ‘ishve vo ġhamze vo naġhme vo jalve

talab kar rahe haiñ ham āfāt kyā kyā

jahāñ mujh ko aayā ḳhayāl aa ga.e vo

dikhā.ī haiñ dil ne karāmāt kyā kyā

na thī guftugū darmiyāñ phir bhī un se

pas-e-parda-e-dil huī baat kyā kyā

tirī zulf-o-ruḳhsār ke dhūp-sā.e

mujhe yaad aate haiñ din raat kyā kyā

ye hichkī ye aañsū ye aa.heñ ye naale

milī haiñ mohabbat meñ sauġhāt kyā kyā

ulaT kar naqāb-e-sifātī jo dekhā

'zahīn' aap the jalva-e-zāt kyā kyā

kahun dost se dost ki baat kya kya

rahi dushmanon se mulaqat kya kya

wo ‘ishwe wo ghamze wo naghme wo jalwe

talab kar rahe hain hum aafat kya kya

jahan mujh ko aaya KHayal aa gae wo

dikhai hain dil ne karamat kya kya

na thi guftugu darmiyan phir bhi un se

pas-e-parda-e-dil hui baat kya kya

teri zulf-o-ruKHsar ke dhup-sae

mujhe yaad aate hain din raat kya kya

ye hichki ye aansu ye aahen ye nale

mili hain mohabbat mein saughat kya kya

ulaT kar naqab-e-sifati jo dekha

'zahin' aap the jalwa-e-zat kya kya