kahun kya iztirab-e-dil zaban se

kahūñ kyā iztirāb-e-dil zabāñ se

rahe jaate haiñ sab pahlū bayāñ se

unheñ chahkā rahā huuñ chāñd kah kar

evaz lenā hai mujh ko āsmāñ se

ham aise nā-tavāñ vo aise nāzuk

uThā.e kaun parda darmiyāñ se

shamīm-e-gul ne baḌh kar haal maarā

qadam bāhar jo rakkhā āshiyāñ se

taḌap merī taraqqī kar rahī hai

zamīñ Takrā na jaa.e āsmāñ se

ḳhudā rakkhe chaman kā phuul ho tum

hañso khelo nasīm-e-bostāñ se

nigāh-e-gul se bulbul yuuñ girī hai

gire jis tarah tinkā āshiyāñ se

zamīn-e-sher ham karte haiñ ābād

chale aate haiñ mazmūñ āsmāñ se

baḌā lañgar thā sher-o-shā.erī kā

uThā kyūñ-kar 'jalīl' nā-tavāñ se

kahun kya iztirab-e-dil zaban se

rahe jate hain sab pahlu bayan se

unhen chahka raha hun chand kah kar

ewaz lena hai mujh ko aasman se

hum aise na-tawan wo aise nazuk

uThae kaun parda darmiyan se

shamim-e-gul ne baDh kar haal mara

qadam bahar jo rakkha aashiyan se

taDap meri taraqqi kar rahi hai

zamin Takra na jae aasman se

KHuda rakkhe chaman ka phul ho tum

hanso khelo nasim-e-bostan se

nigah-e-gul se bulbul yun giri hai

gire jis tarah tinka aashiyan se

zamin-e-sher hum karte hain aabaad

chale aate hain mazmun aasman se

baDa langar tha sher-o-shaeri ka

uTha kyun-kar 'jalil' na-tawan se