kaif-e-gham lutf-e-alam yaad aaya

kaif-e-ġham lutf-e-alam yaad aayā

kis kā andāz-e-karam yaad aayā

jāda-e-zīst ke har moḌ pe kyoñ

kākul-e-yār kā ḳham yaad aayā

kar gayā ġharq-e-nadāmat dil ko

jab tirī aañkh kā nam yaad aayā

na gayā phir tire aane kā ḳhayāl

terā jaanā bhī na kam yaad aayā

paayā zulmat se tajallī kā shu.ūr

dair meñ jā ke haram yaad aayā

khul gayā vus.at-e-dāmāñ kā bharam

kyoñ tirā dast-e-karam yaad aaya

aa gayā nām-e-ḳhudā lab pe mire

jab vo patthar kā sanam yaad aayā

jī meñ aayā hī thā jiine kā ḳhayāl

yak-ba-yak shahr-e-adam yaad aayā

fikr hai ḳhuld-ba-dāmāñ 'at.har'

kūcha-e-rashk-e-iram yaad aayā

kaif-e-gham lutf-e-alam yaad aaya

kis ka andaz-e-karam yaad aaya

jada-e-zist ke har moD pe kyon

kakul-e-yar ka KHam yaad aaya

kar gaya gharq-e-nadamat dil ko

jab teri aankh ka nam yaad aaya

na gaya phir tere aane ka KHayal

tera jaana bhi na kam yaad aaya

paya zulmat se tajalli ka shuur

dair mein ja ke haram yaad aaya

khul gaya wusat-e-daman ka bharam

kyon tera dast-e-karam yaad aaya

aa gaya nam-e-KHuda lab pe mere

jab wo patthar ka sanam yaad aaya

ji mein aaya hi tha jine ka KHayal

yak-ba-yak shahr-e-adam yaad aaya

fikr hai KHuld-ba-daman 'athar'

kucha-e-rashk-e-iram yaad aaya