kaifiyat hi kaifiyat mein hum kahan tak aa gae

kaifiyat hī kaifiyat meñ ham kahāñ tak aa ga.e

be-ḳhudī vo thī ki un ke āstāñ tak aa ga.e

vaqt kī rau meñ bahe the jaane kis andāz meñ

ye ḳhabar bhī ho na paa.ī ham kahāñ tak aa ga.e

ḳhud sukūn-e-āgahī ne ruuh ko taskīn dī

ham bichhaḌ kar jab ġhubār-e-kārvāñ tak aa ga.e

sar-faroshān-e-vafā ko bhī na chhoḌā ishq ne

marhale saarī ḳhatā ke mehrbāñ tak aa ga.e

rāh-e-manzil kī jahāñ pahchānñā dushvār thī

zindagī tere qadam aise nishāñ tak aa ga.e

har qadam par ham ko duniyā roktī hī rah ga.ī

ek jazba thā jo tere āstāñ tak aa ga.e

milnā thā husn-e-bayāñ ko ek iz.hār-e-ḳhulūs

lafz-o-ma.anī ḳhud-baḳhud urdu zabāñ tak aa ga.e

dekhnā hai faisla mauj-e-havādis kā 'mubīn'

kashtī-e-dil le ke bahr-e-be-karāñ tak aa ga.e

kaifiyat hi kaifiyat mein hum kahan tak aa gae

be-KHudi wo thi ki un ke aastan tak aa gae

waqt ki rau mein bahe the jaane kis andaz mein

ye KHabar bhi ho na pai hum kahan tak aa gae

KHud sukun-e-agahi ne ruh ko taskin di

hum bichhaD kar jab ghubar-e-karwan tak aa gae

sar-faroshan-e-wafa ko bhi na chhoDa ishq ne

marhale sari KHata ke mehrban tak aa gae

rah-e-manzil ki jahan pahchanna dushwar thi

zindagi tere qadam aise nishan tak aa gae

har qadam par hum ko duniya rokti hi rah gai

ek jazba tha jo tere aastan tak aa gae

milna tha husn-e-bayan ko ek izhaar-e-KHulus

lafz-o-mani KHud-baKHud urdu zaban tak aa gae

dekhna hai faisla mauj-e-hawadis ka 'mubin'

kashti-e-dil le ke bahr-e-be-karan tak aa gae