kaise dukh kitni chah se dekha

kaise dukh kitnī chaah se dekhā

tujhe kis kis nigāh se dekhā

shiddat-e-lā-zavāl se chāhā

hasrat-e-be-panāh se dekhā

itnā sochā tujhe ki duniyā ko

ham ne terī nigāh se dekhā

shauq kyā ġhair-mo'tabar Thahrā

tū ne jab ishtibāh se dekhā

apnī tārīk zindagī meñ tujhe

ḳhūb-tar mahr o maah se dekhā

ahl-e-dil par tirī kashish kā asar

apne hāl-e-tabāh se dekhā

dushmanoñ se jo ġham na dekhā thā

koshish-e-ḳhair-ḳhvāh se dekhā

ġham girāñ-tar hai koh se jaanā

ham subuk-tar haiñ kaah se dekhā

dā.imī dūriyoñ kā sadma 'ziyā'

sarsarī rasm-o-rāh se dekhā

kaise dukh kitni chah se dekha

tujhe kis kis nigah se dekha

shiddat-e-la-zawal se chaha

hasrat-e-be-panah se dekha

itna socha tujhe ki duniya ko

hum ne teri nigah se dekha

shauq kya ghair-mo'tabar Thahra

tu ne jab ishtibah se dekha

apni tarik zindagi mein tujhe

KHub-tar mahr o mah se dekha

ahl-e-dil par teri kashish ka asar

apne haal-e-tabah se dekha

dushmanon se jo gham na dekha tha

koshish-e-KHair-KHwah se dekha

gham giran-tar hai koh se jaana

hum subuk-tar hain kah se dekha

daimi duriyon ka sadma 'ziya'

sarsari rasm-o-rah se dekha