kaise hangama-e-fursat mein mile hain tujhse

kaise hañgāma-e-fursat meñ mile haiñ tujh se

ham bhare shahr kī ḳhalvat meñ mile haiñ tujh se

saa.e se saayā guzartā huā mahsūs huā

ik ajab ḳhvāb kī hairat meñ mile haiñ tujh se

itnā shaffāf nahīñ hai abhī aks-e-dil-o-jāñ

aa.ine gard-e-masāfat meñ mile haiñ tujh se

is qadar tañg nahīñ vus.at-e-sahrā-e-jahāñ

ham to ik aur hī vahshat meñ mile haiñ tujh se

juz ġham-e-'ishq koī kaam nahīñ hai so ai husn

jab mile ik na.ī hālat meñ mile haiñ tujh se

vaqt kā sail-e-ravāñ rok hī leñge shāyad

vo jo phir milne kī hasrat meñ mile haiñ tujh se

itnā ḳhush-fahm na ho apnī pazīrā.ī par

ham kisī aur mohabbat meñ mile haiñ tujh se

yaad kā zaḳhm bhī ham tujh ko nahīñ de sakte

dekh kis ālam-e-ġhurbat meñ mile haiñ tujh se

ab agar lauT ke aa.e to zarā Thahreñge

ham musāfir haiñ so ujlat meñ mile haiñ tujh se

kaise hangama-e-fursat mein mile hain tujh se

hum bhare shahr ki KHalwat mein mile hain tujh se

sae se saya guzarta hua mahsus hua

ek ajab KHwab ki hairat mein mile hain tujh se

itna shaffaf nahin hai abhi aks-e-dil-o-jaan

aaine gard-e-masafat mein mile hain tujh se

is qadar tang nahin wusat-e-sahra-e-jahan

hum to ek aur hi wahshat mein mile hain tujh se

juz gham-e-'ishq koi kaam nahin hai so ai husn

jab mile ek nai haalat mein mile hain tujh se

waqt ka sail-e-rawan rok hi lenge shayad

wo jo phir milne ki hasrat mein mile hain tujh se

itna KHush-fahm na ho apni pazirai par

hum kisi aur mohabbat mein mile hain tujh se

yaad ka zaKHm bhi hum tujh ko nahin de sakte

dekh kis aalam-e-ghurbat mein mile hain tujh se

ab agar lauT ke aae to zara Thahrenge

hum musafir hain so ujlat mein mile hain tujh se