kaise kaise swang rachae humne duniya-dari mein

kaise kaise svāñg rachā.e ham ne duniyā-dārī meñ

yuuñ hī saarī umar gañvā dī auroñ ġham-ḳhvārī meñ

ham bhī kitne sāda-dil the sīdhī sachchī baat kareñ

logoñ ne kyā kyā kah Daalā lahjoñ kī tah-dārī meñ

jab duniyā par bas na chale to andar andar khuḌhnā kyā

kuchh bele ke phuul khilā.eñ āñgan kī phulvārī meñ

ka.ī dinoñ se jism o jaañ par ik be-kaifī chhā.ī hai

bhiig rahī hai raat sunāo koī ġhazal darbārī meñ

aane vaale kal kī ḳhātir har har pal qurbān kiyā

haal ko dafnā dete haiñ ham jiine kī tayyārī meñ

tum bhī in biite barsoñ kī koī nishānī le aanā

maiñ tum se milne ā.ūñgī isī basantī saarī meñ

ab kī baar jo ghar jaanā to saare album le aanā

vaqt kī dīmak lag jaatī hai yādoñ kī almārī meñ

kaise kaise swang rachae hum ne duniya-dari mein

yun hi sari umar ganwa di auron gham-KHwari mein

hum bhi kitne sada-dil the sidhi sachchi baat karen

logon ne kya kya kah Dala lahjon ki tah-dari mein

jab duniya par bas na chale to andar andar khuDhna kya

kuchh bele ke phul khilaen aangan ki phulwari mein

kai dinon se jism o jaan par ek be-kaifi chhai hai

bhig rahi hai raat sunao koi ghazal darbari mein

aane wale kal ki KHatir har har pal qurban kiya

haal ko dafna dete hain hum jine ki tayyari mein

tum bhi in bite barson ki koi nishani le aana

main tum se milne aaungi isi basanti sari mein

ab ki bar jo ghar jaana to sare album le aana

waqt ki dimak lag jati hai yaadon ki almari mein