kaise karun main zabt-e-raaz tu hi mujhe bata ki yun

kaise karūñ maiñ zabt-e-rāz tū hī mujhe batā ki yuuñ

ai dil-e-zār sharah-e-rāz mujh se bhī tū chhupā ki yuuñ

kaise chhupā.ūñ soz-e-dil tū hī mujhe batā ki yuuñ

sham.a bujhā dī yaar ne jaise thā mudda.ā ki yuuñ

ek shikast-e-zāhirī fat.h bane to kis tarah

ā.īna-dār ban gayā qissa-e-karbalā ki yuuñ

soch rahā thā ġham-nasīb bigḌī bane to kis tarah

rahmat-o-lutf-e-kirdgār ban ga.e aasrā ki yuuñ

ye jo kahā ki pās-e-ishq husn ko kuchh to chāhiye

dast-e-karam ba-dosh-e-ġhair yaar ne rakh diyā ki yuuñ

pūchhā ḳhitāb yaar se kis tarah kījiye shām-e-vasl

chupke se andalīb ne phuul se kuchh kahā ki yuuñ

lutf-e-jafā-e-dost kā kaise adā ho shukriya

lazzat-e-sorish-e-jigar dene lagī duā ki yuuñ

ham-nafas-o-habīb-e-ḳhās bante haiñ ġhair kis tarah

bolī ye sard-mehrī-e-umr-e-gurez-pā ki yuuñ

donoñ hoñ kaise ek jā 'mehdī' surūr-o-soz-e-dil

barq-e-nigāh-e-nāz ne gir ke batā diyā ki yuuñ

kaise karun main zabt-e-raaz tu hi mujhe bata ki yun

ai dil-e-zar sharah-e-raaz mujh se bhi tu chhupa ki yun

kaise chhupaun soz-e-dil tu hi mujhe bata ki yun

shama bujha di yar ne jaise tha muddaa ki yun

ek shikast-e-zahiri fath bane to kis tarah

aaina-dar ban gaya qissa-e-karbala ki yun

soch raha tha gham-nasib bigDi bane to kis tarah

rahmat-o-lutf-e-kirdgar ban gae aasra ki yun

ye jo kaha ki pas-e-ishq husn ko kuchh to chahiye

dast-e-karam ba-dosh-e-ghair yar ne rakh diya ki yun

puchha KHitab yar se kis tarah kijiye sham-e-wasl

chupke se andalib ne phul se kuchh kaha ki yun

lutf-e-jafa-e-dost ka kaise ada ho shukriya

lazzat-e-sorish-e-jigar dene lagi dua ki yun

ham-nafas-o-habib-e-KHas bante hain ghair kis tarah

boli ye sard-mehri-e-umr-e-gurez-pa ki yun

donon hon kaise ek ja 'mehdi' surur-o-soz-e-dil

barq-e-nigah-e-naz ne gir ke bata diya ki yun