kaise rishton ko sameTen ye bikharte hue log

kaise rishtoñ ko sameTeñ ye bikharte hue log

TuuT jaate haiñ yahī faisla karte hue log

ġhaur se dekho hameñ, dekh ke ibrat hogī

aise hote haiñ bulandī se utarte hue log

ai ḳhudā ma.arka-e-lashkar-e-shab baaqī hai

aur mire saath haiñ parchhā.īñ se Darte hue log

mar ke dekheñge kabhī ham bhii, sunā hai ham ne

muskurāte haiñ tirī raah meñ marte hue log

qaid-ḳhānoñ ke añdheroñ meñ baḌe chain se haiñ

apne andar ke ujāloñ se guzarte hue log

kitne chehroñ pe sar-e-bazm kareñge tanqīd

aa.ina dekh ke tanhā.ī meñ Darte hue log

ḳhud-kushī karne pe āmāda o majbūr haiñ ab

zindagī! ye haiñ tire ishq meñ marte hue log

tum to be-vaj.h pareshān hue ho 'tāriq'

yūñhī pesh aate haiñ va.adoñ se mukarte hue log

kaise rishton ko sameTen ye bikharte hue log

TuT jate hain yahi faisla karte hue log

ghaur se dekho hamein, dekh ke ibrat hogi

aise hote hain bulandi se utarte hue log

ai KHuda marka-e-lashkar-e-shab baqi hai

aur mere sath hain parchhain se Darte hue log

mar ke dekhenge kabhi hum bhi, suna hai hum ne

muskuraate hain teri rah mein marte hue log

qaid-KHanon ke andheron mein baDe chain se hain

apne andar ke ujalon se guzarte hue log

kitne chehron pe sar-e-bazm karenge tanqid

aaina dekh ke tanhai mein Darte hue log

KHud-kushi karne pe aamada o majbur hain ab

zindagi! ye hain tere ishq mein marte hue log

tum to be-wajh pareshan hue ho 'tariq'

yunhi pesh aate hain wadon se mukarte hue log