kal ai aashob-e-nala aaj nahin

kal ai āshob-e-nāla aaj nahīñ

aaj hañgāma par mizāj nahīñ

ġhair us ke ki ḳhuub roiye aur

ġham-e-dil kā koī ilaaj nahīñ

ab bhī qīmat hai dil kī gosha-e-chashm

itnī ye jins be-rivāj nahīñ

shah ko bhī chāhiye hai gor-o-kafan

kaun hai jis ko ehtiyāj nahīñ

dil se bas haath uThā tū ab ai ishq

deh-e-vīrān par ḳhirāj nahīñ

do-jahāñ bhī mileñ to bas hai hameñ

yaañ kuchh itnī to ehtiyāj nahīñ

kar na jur.at tū ai tabīb ki ye

dil kā dhaḌkā hai iḳhtilāj nahīñ

maiñ to 'qā.em' kahe thā tujh se aah

dil-e-nāzuk hai ye zujāj nahīñ

kal ai aashob-e-nala aaj nahin

aaj hangama par mizaj nahin

ghair us ke ki KHub roiye aur

gham-e-dil ka koi ilaj nahin

ab bhi qimat hai dil ki gosha-e-chashm

itni ye jins be-riwaj nahin

shah ko bhi chahiye hai gor-o-kafan

kaun hai jis ko ehtiyaj nahin

dil se bas hath uTha tu ab ai ishq

deh-e-viran par KHiraj nahin

do-jahan bhi milen to bas hai hamein

yan kuchh itni to ehtiyaj nahin

kar na jurat tu ai tabib ki ye

dil ka dhaDka hai iKHtilaj nahin

main to 'qaem' kahe tha tujh se aah

dil-e-nazuk hai ye zujaj nahin