kal gae the tum jise bimar-e-hijran chhoD kar

kal ga.e the tum jise bīmār-e-hijrāñ chhoḌ kar

chal basā vo aaj sab hastī kā sāmāñ chhoḌ kar

tifl-e-ashk aisā girā dāmān-e-mizhgāñ chhoḌ kar

phir na uTThā kūcha-e-chāk-e-garebāñ chhoḌ kar

kyūñki nikle terā us kā dil meñ paikāñ chhoḌ kar

jaa.e baize ko kahāñ ye murġh-e-parrāñ chhoḌ kar

jis ne ho lazzat uThā.ī zaḳhm teġh-e-ishq kī

kab vo marham-dān ko DhūñDe namak-dāñ chhoḌ kar

said-e-dil ko kyūñki chhoḌe jab ki dikhlā de na tū

machhliyāñ dast-e-hinā.ī meñ mirī jaañ chhoḌ kar

sard-mehrī se kisī kī aage hī jī sard hai

yaañ se haT jā dhuup ai abr-e-ḳhirāmāñ chhoḌ kar

dekhiye kyā ho ki hai ab jaan ke pīchhe paḌī

dil ko ai kāfir tirī zulf-e-pareshāñ chhoḌ kar

ai dil us ke tiir ke hamrāh siine se nikal

varna pachhtā.egā tū ye saath nādāñ chhoḌ kar

kyuuñ na ram kar jaa.eñ aahū aise vahshī se tire

sher bhāgeñ jis ke nāloñ se nīstāñ chhoḌ kar

surḳhi-e-pāñ dekh le zāhid jo dandāñ par tire

uTh khaḌā ho haath se tasbīh-e-marjāñ chhoḌ kar

pesh-ḳhema le ke niklā gard-bād-e-dūr-rau

hai jo sargarm-e-safar tan ko mirī jaañ chhoḌ kar

gar ḳhudā deve qanā.at māh-e-do-hafta kī tarah

dauḌe saarī ko kabhī aadhī na insāñ chhoḌ kar

sāġhar-e-dil bechtā aayā huuñ kho mat haath se

cūktā hai kyuuñ ye jins-e-dast-gardāñ chhoḌ kar

kaam ye terā hī thā rahmat ho ai abr-e-karam

varna jaa.e dāġh-e-isyāñ merā dāmāñ chhoḌ kar

paḌh ġhazal ai 'zauq' koī garm sī ab to na jā

jānib-e-mazmūn tarz-e-tufta-jānāñ chhoḌ kar

kal gae the tum jise bimar-e-hijran chhoD kar

chal basa wo aaj sab hasti ka saman chhoD kar

tifl-e-ashk aisa gira daman-e-mizhgan chhoD kar

phir na uTTha kucha-e-chaak-e-gareban chhoD kar

kyunki nikle tera us ka dil mein paikan chhoD kar

jae baize ko kahan ye murgh-e-parran chhoD kar

jis ne ho lazzat uThai zaKHm tegh-e-ishq ki

kab wo marham-dan ko DhunDe namak-dan chhoD kar

said-e-dil ko kyunki chhoDe jab ki dikhla de na tu

machhliyan dast-e-hinai mein meri jaan chhoD kar

sard-mehri se kisi ki aage hi ji sard hai

yan se haT ja dhup ai abr-e-KHiraman chhoD kar

dekhiye kya ho ki hai ab jaan ke pichhe paDi

dil ko ai kafir teri zulf-e-pareshan chhoD kar

ai dil us ke tir ke hamrah sine se nikal

warna pachhtaega tu ye sath nadan chhoD kar

kyun na ram kar jaen aahu aise wahshi se tere

sher bhagen jis ke nalon se nistan chhoD kar

surKHi-e-pan dekh le zahid jo dandan par tere

uTh khaDa ho hath se tasbih-e-marjaan chhoD kar

pesh-KHema le ke nikla gard-baad-e-dur-rau

hai jo sargarm-e-safar tan ko meri jaan chhoD kar

gar KHuda dewe qanaat mah-e-do-hafta ki tarah

dauDe sari ko kabhi aadhi na insan chhoD kar

saghar-e-dil bechta aaya hun kho mat hath se

cukta hai kyun ye jins-e-dast-gardan chhoD kar

kaam ye tera hi tha rahmat ho ai abr-e-karam

warna jae dagh-e-isyan mera daman chhoD kar

paDh ghazal ai 'zauq' koi garm si ab to na ja

jaanib-e-mazmun tarz-e-tufta-jaanan chhoD kar