kal nashshe mein tha wo but masjid mein gar aa jata

kal nashshe meñ thā vo but masjid meñ gar aa jaatā

īmāñ se kaho yaaro phir kis se rahā jaatā

murde ko jilā lete girte ko uThā lete

ik dam ko jo yaañ aate to aap kā kyā jaatā

ye kahiye ki dhyān us ko aatā hī nahīñ varna

mahshar se to sau fitne vo dam meñ uThā jaatā

mahfil meñ mujhe dekhā to hañs ke lage kahne

aane se har ik ke hai sohbat kā mazā jaatā

ī.zā.en ye paa.ī haiñ maqdūr agar hotā

maiñ rasm-e-ta.ashshuq ko duniyā se uThā jaatā

kyuuñ paas mire aa kar yuuñ baiThe ho muñh phere

kyā lab tire misrī haiñ maiñ jin ko chabā jaatā

kyā jalva-numā vo mah koThe pe huā aa kar

kuchh aaj savere se sūraj hai chhupā jaatā

ye kāhisheñ kyuuñ hotīñ ghabrā ke agar ye dil

pahlū se nikal jaatā ārām sā aa jaatā

achchhā huā mahfil meñ 'majrūh' na kuchh bolā

vo haal agar kahtā to kis se sunā jaatā

kal nashshe mein tha wo but masjid mein gar aa jata

iman se kaho yaro phir kis se raha jata

murde ko jila lete girte ko uTha lete

ek dam ko jo yan aate to aap ka kya jata

ye kahiye ki dhyan us ko aata hi nahin warna

mahshar se to sau fitne wo dam mein uTha jata

mahfil mein mujhe dekha to hans ke lage kahne

aane se har ek ke hai sohbat ka maza jata

izaen ye pai hain maqdur agar hota

main rasm-e-tashshuq ko duniya se uTha jata

kyun pas mere aa kar yun baiThe ho munh phere

kya lab tere misri hain main jin ko chaba jata

kya jalwa-numa wo mah koThe pe hua aa kar

kuchh aaj sawere se suraj hai chhupa jata

ye kahishen kyun hotin ghabra ke agar ye dil

pahlu se nikal jata aaram sa aa jata

achchha hua mahfil mein 'majruh' na kuchh bola

wo haal agar kahta to kis se suna jata