kal pardes mein yaad aaegi dhyan mein rakh

kal pardes meñ yaad aa.egī dhyān meñ rakh

apne shahr kī miTTī bhī sāmān meñ rakh

saare jism ko le kar ghuum zamāne meñ

bas ik dil kī dhaḌkan pākistān meñ rakh

jaane kis raste se kirneñ aa jaa.eñ

dil dahlīz pe āñkheñ raushan-dān meñ rakh

jhiil meñ ik mahtāb zarūrī hotā hai

koī tamannā is chashm-e-hairān meñ rakh

ham se shart lagāne kī ik sūrat hai

apne saare ḳhvāb yahāñ maidān meñ rakh

jab bhī chāhūñ terā chehrā soch sakūñ

bas itnī sī baat mire imkān meñ rakh

titlī rasta bhuul ke aa bhī saktī hai

kāġhaz ke ye phuul abhī gul-dān meñ rakh

apne dil se rusvā.ī kā ḳhauf nikāl

'az.har' ab tasvīr mirī dālān meñ rakh

kal pardes mein yaad aaegi dhyan mein rakh

apne shahr ki miTTi bhi saman mein rakh

sare jism ko le kar ghum zamane mein

bas ek dil ki dhaDkan pakistan mein rakh

jaane kis raste se kirnen aa jaen

dil dahliz pe aankhen raushan-dan mein rakh

jhil mein ek mahtab zaruri hota hai

koi tamanna is chashm-e-hairan mein rakh

hum se shart lagane ki ek surat hai

apne sare KHwab yahan maidan mein rakh

jab bhi chahun tera chehra soch sakun

bas itni si baat mere imkan mein rakh

titli rasta bhul ke aa bhi sakti hai

kaghaz ke ye phul abhi gul-dan mein rakh

apne dil se ruswai ka KHauf nikal

'azhar' ab taswir meri dalan mein rakh