kal raat kai KHwab-e-pareshan nazar aae

kal raat ka.ī ḳhvāb-e-pareshāñ nazar aa.e

jo shahr ki ābād the vīrāñ nazar aa.e

bikhrī huī roñdī huī lāshoñ se guzar kar

TuuTe hue mīnār-e-shahīdāñ nazar aa.e

kohsār-e-himāla kī jhalak ḳhvāb meñ dekhī

gañgā meñ ubalte hue tūfāñ nazar aa.e

pahle to kisī qarya-e-barbād meñ Thahre

aage jo baḌhe gor-e-ġharībāñ nazar aa.e

mahkī huī ajdād kī ḳhushbū se havā.eñ

har-gām pe āsār-e-azīzāñ nazar aa.e

jis ghar meñ farishtoñ kī ziyā thī usī ghar meñ

arvāh-e-ḳhabīsa ke charāġhāñ nazar aa.e

jo matla-e-taqdīs-e-mohabbat the vo chehre

ḳhafagī ke sabab ham se gurezāñ nazar aa.e

ham jin ko daġhā de ke kahīñ bhaag ga.e the

vo ahl-e-haram bā-sar-e-uryāñ nazar aa.e

ik pīr-e-muqaddas kā hayūlā nazar aayā

phir rīsh-e-safed-o-dur-e-dandāñ nazar aa.e

ham jin kī pareshānī-e-ḳhātir kā sabab the

vo ālam-e-rūyā meñ pareshāñ nazar aa.e

ik dāman-e-ismat kī kiran duur se phūTī

dāman pe ka.ī gauhar-e-ġhaltāñ nazar aa.e

thī jis ke tabassum meñ malā.ek kī halāvat

sad-haif ki vo ḳhvāb meñ giryāñ nazar aa.e

is shahr ko jo shaḳhs ke maulid kā sharaf ho

vo shaḳhs usī shahr meñ mehmāñ nazar aa.e

lab par hai 'ra.īs' apne ye misra.a ka.ī din se

kal raat ka.ī ḳhvāb pareshāñ nazar aa.e

kal raat kai KHwab-e-pareshan nazar aae

jo shahr ki aabaad the viran nazar aae

bikhri hui rondi hui lashon se guzar kar

TuTe hue minar-e-shahidan nazar aae

kohsar-e-himala ki jhalak KHwab mein dekhi

ganga mein ubalte hue tufan nazar aae

pahle to kisi qarya-e-barbaad mein Thahre

aage jo baDhe gor-e-ghariban nazar aae

mahki hui ajdad ki KHushbu se hawaen

har-gam pe aasar-e-azizan nazar aae

jis ghar mein farishton ki ziya thi usi ghar mein

arwah-e-KHabisa ke charaghan nazar aae

jo matla-e-taqdis-e-mohabbat the wo chehre

KHafagi ke sabab hum se gurezan nazar aae

hum jin ko dagha de ke kahin bhag gae the

wo ahl-e-haram ba-sar-e-uryan nazar aae

ek pir-e-muqaddas ka hayula nazar aaya

phir rish-e-safed-o-dur-e-dandan nazar aae

hum jin ki pareshani-e-KHatir ka sabab the

wo aalam-e-ruya mein pareshan nazar aae

ek daman-e-ismat ki kiran dur se phuTi

daman pe kai gauhar-e-ghaltan nazar aae

thi jis ke tabassum mein malaek ki halawat

sad-haif ki wo KHwab mein giryan nazar aae

is shahr ko jo shaKHs ke maulid ka sharaf ho

wo shaKHs usi shahr mein mehman nazar aae

lab par hai 'rais' apne ye misra kai din se

kal raat kai KHwab pareshan nazar aae