kal raat mere sath ajab hadisa hua

kal raat mere saath ajab hādisa huā

sūraj pighal ke merī hathelī pe aa girā

dekhe haiñ merī āñkhoñ ne manzar ajab ajab

ik peḌ mere shahr kā sāyoñ ko khā gayā

sahrā meñ aab aur samundar meñ ret hai

yā-rab maiñ aaj kaun sī duniyā meñ aa gayā

kaisā tamāsha dekhā thā ham ne ye raat bhar

taare chamak rahe the magar āsmāñ na thā

rahzan to ḳhud hī Dar ke guphāoñ meñ chhup ga.e

ab rāh-rau ko lūTtā phirtā hai rāstā

in sā.atoñ ko sub.h kaheñ bhī to kis tarah

sūraj ugā huā thā añdherā chhaTā na thā

bādal baras rahe haiñ musalsal magar 'ḳhumār'

dariyā tamām ḳhushk haiñ jharnoñ ko kyā huā

kal raat mere sath ajab hadisa hua

suraj pighal ke meri hatheli pe aa gira

dekhe hain meri aankhon ne manzar ajab ajab

ek peD mere shahr ka sayon ko kha gaya

sahra mein aab aur samundar mein ret hai

ya-rab main aaj kaun si duniya mein aa gaya

kaisa tamasha dekha tha hum ne ye raat bhar

tare chamak rahe the magar aasman na tha

rahzan to KHud hi Dar ke guphaon mein chhup gae

ab rah-rau ko luTta phirta hai rasta

in saaton ko subh kahen bhi to kis tarah

suraj uga hua tha andhera chhaTa na tha

baadal baras rahe hain musalsal magar 'KHumar'

dariya tamam KHushk hain jharnon ko kya hua