kal se dil-e-bimar ki haalat nahin achchhi

kal se dil-e-bīmār kī hālat nahīñ achchhī

allāh kare ḳhair ho sūrat nahīñ achchhī

us shoḳh se milne kī ye sūrat nahīñ achchhī

maut achchhī magar ġhair kī minnat nahīñ achchhī

maiñ āshiq-e-gesū huuñ bahaltā hai yahīñ dil

kyūñkar ye kahūñ qabr kī vahshat nahīñ achchhī

dekho ki gale milte hī sar kāTtī hai teġh

sach kahte haiñ zālim kī mohabbat nahīñ achchhī

kah kar kamar-e-yār ko mādūm hue ġham

har jā pe tabī.at kī bhī jaudat nahīñ achchhī

qātil tujhe degā lab-e-har-zaḳhm duā.eñ

har-vaqt namak Daal ye ḳhissat nahīñ achchhī

ai shaiḳh na kar shauq meñ hūroñ kī ibādat

hargiz na mileñgī tirī niyyat nahīñ achchhī

ye kah ke lahad merī vo kar jaate haiñ pāmāl

phir is ko banāo ki ye turbat nahīñ achchhī

ik aib bhī hai husn ke hamrāh butoñ meñ

sūrat agar achchhī hai to sīrat nahīñ achchhī

hai hai tujhe kis zālim-e-be-rahm ne rauñdā

hālat jo tirī sabza-e-turbat nahīñ achchhī

kyoñ tuur sharār-e-ruḳh-e-raushan se jalā.e

kah de koī un se ye sharārat nahīñ achchhī

jaate hī tire chhā ga.ī ghar bhar meñ udāsī

maiñ kyā dar-o-dīvār kī hālat nahīñ achchhī

ushshāq ko vo dekhte haiñ chashm-e-ġhazab se

ik mus.haf-e-ruḳh meñ yahī sūrat nahīñ achchhī

paidā karo andāz na.e taaza adā.eñ

zulm-o-sitam-o-jaur meñ jiddat nahīñ achchhī

maiñ ne jo kahā ranj hai kyā marg-e-adū kā

bole ki nahīñ merī tabī.at nahīñ achchhī

ai dīda-e-tar ro ki kaTeñ hijr kī rāteñ

barsāt meñ paanī kī ye qillat nahīñ achchhī

gherā jo mujhe dā.era-e-ranj-o-alam ne

kyā mere muqaddar kī kitābat nahīñ achchhī

ai 'bazm' uThā kartā hai kyoñ dard jigar meñ

sach kah kise dekhā ki tabī.at nahīñ achchhī

kal se dil-e-bimar ki haalat nahin achchhi

allah kare KHair ho surat nahin achchhi

us shoKH se milne ki ye surat nahin achchhi

maut achchhi magar ghair ki minnat nahin achchhi

main aashiq-e-gesu hun bahalta hai yahin dil

kyunkar ye kahun qabr ki wahshat nahin achchhi

dekho ki gale milte hi sar kaTti hai tegh

sach kahte hain zalim ki mohabbat nahin achchhi

kah kar kamar-e-yar ko madum hue gham

har ja pe tabiat ki bhi jaudat nahin achchhi

qatil tujhe dega lab-e-har-zaKHm duaen

har-waqt namak Dal ye KHissat nahin achchhi

ai shaiKH na kar shauq mein huron ki ibaadat

hargiz na milengi teri niyyat nahin achchhi

ye kah ke lahad meri wo kar jate hain pamal

phir is ko banao ki ye turbat nahin achchhi

ek aib bhi hai husn ke hamrah buton mein

surat agar achchhi hai to sirat nahin achchhi

hai hai tujhe kis zalim-e-be-rahm ne raunda

haalat jo teri sabza-e-turbat nahin achchhi

kyon tur sharar-e-ruKH-e-raushan se jalae

kah de koi un se ye shararat nahin achchhi

jate hi tere chha gai ghar bhar mein udasi

main kya dar-o-diwar ki haalat nahin achchhi

ushshaq ko wo dekhte hain chashm-e-ghazab se

ek mushaf-e-ruKH mein yahi surat nahin achchhi

paida karo andaz nae taza adaen

zulm-o-sitam-o-jaur mein jiddat nahin achchhi

main ne jo kaha ranj hai kya marg-e-adu ka

bole ki nahin meri tabiat nahin achchhi

ai dida-e-tar ro ki kaTen hijr ki raaten

barsat mein pani ki ye qillat nahin achchhi

ghera jo mujhe daera-e-ranj-o-alam ne

kya mere muqaddar ki kitabat nahin achchhi

ai 'bazm' uTha karta hai kyon dard jigar mein

sach kah kise dekha ki tabiat nahin achchhi