kal tak jo kuchh na tha mera iman ho gaya

kal tak jo kuchh na thā mirā īmān ho gayā

ik aam aadmī se maiñ insān ho gayā

dekhe the ḳhvāb maiñ ne bahut zindagī ke dost

kyā ghar isī liye mirā sunsān ho gayā

ḳhud ko bhī bhuul baiThā thā maiñ tere vāste

tū aur kyoñ kisī kī yahāñ jaan ho gayā

milne kī chaah mil ke baḌhī tujh se aur bhī

puurā agarche dil kā ye armān ho gayā

tū umr bhar na saath de chashm-e-karam hī kar

māneñge ye bhī ik tirā ehsān ho gayā

kal tak jo mujh pe jaan chhiḌaktā thā aaj kyoñ

dukh-dard se bhī mere vo anjān ho gayā

sadiyoñ ke baad lauT ke aayā thā kaise par

rasm-e-zamāna dekh ke hairān ho gayā

thā ḳhush-mizāj bhī na.e jazbe ke saath jo

do-chār gaam chal ke vo be-jān ho gayā

chhapvā ke chand ġhazleñ hī kahtā phire hai vo

lo aaj maiñ bhī sāhab-e-dīvān ho gayā

shāgird kāmyāb to ustād kāmyāb

hai fikr mujh ko vo mirī pahchān ho gayā

'hāsil' tujhe to fikr thā ḳhud par bahut kabhī

tū kyoñ kisī ke khel kā sāmān ho gayā

kal tak jo kuchh na tha mera iman ho gaya

ek aam aadmi se main insan ho gaya

dekhe the KHwab main ne bahut zindagi ke dost

kya ghar isi liye mera sunsan ho gaya

KHud ko bhi bhul baiTha tha main tere waste

tu aur kyon kisi ki yahan jaan ho gaya

milne ki chah mil ke baDhi tujh se aur bhi

pura agarche dil ka ye arman ho gaya

tu umr bhar na sath de chashm-e-karam hi kar

manenge ye bhi ek tera ehsan ho gaya

kal tak jo mujh pe jaan chhiDakta tha aaj kyon

dukh-dard se bhi mere wo anjaan ho gaya

sadiyon ke baad lauT ke aaya tha kaise par

rasm-e-zamana dekh ke hairan ho gaya

tha KHush-mizaj bhi nae jazbe ke sath jo

do-chaar gam chal ke wo be-jaan ho gaya

chhapwa ke chand ghazlen hi kahta phire hai wo

lo aaj main bhi sahab-e-diwan ho gaya

shagird kaamyab to ustad kaamyab

hai fikr mujh ko wo meri pahchan ho gaya

'hasil' tujhe to fikr tha KHud par bahut kabhi

tu kyon kisi ke khel ka saman ho gaya