kal uTh ke aae the patthar ke devtaon tak

kal uTh ke aa.e the patthar ke devtāoñ tak

aur aaj pahuñche ham alfāz ke ḳhudāoñ tak

hudūd-e-jism se aage baḌhe to ye dekhā

ki tishnagī thī barahna tirī adāoñ tak

safīna ġharq huā hai unhīñ kā maujoñ meñ

ki jin ke 'azm kī quvvat thī nā-ḳhudāoñ tak

ye haath āhanī dīvār bhī girā deñge

vo log bhaag ke jā.eñge kin guphāoñ tak

hazār baar huī tujh se munharif duniyā

hazār baar phir aa.ī tirī sadāoñ tak

unhīñ ko pahle milī ārzūoñ kī manzil

jo qāfile na pahuñch paa.e rahnumāoñ tak

'azāb-e-jāñ jinheñ samjhā thā ham ne ai 'shaukat'

palaT ke aa ga.e ham phir unhīñ balāoñ tak

kal uTh ke aae the patthar ke dewtaon tak

aur aaj pahunche hum alfaz ke KHudaon tak

hudud-e-jism se aage baDhe to ye dekha

ki tishnagi thi barahna teri adaon tak

safina gharq hua hai unhin ka maujon mein

ki jin ke 'azm ki quwwat thi na-KHudaon tak

ye hath aahani diwar bhi gira denge

wo log bhag ke jaenge kin guphaon tak

hazar bar hui tujh se munharif duniya

hazar bar phir aai teri sadaon tak

unhin ko pahle mili aarzuon ki manzil

jo qafile na pahunch pae rahnumaon tak

'azab-e-jaan jinhen samjha tha hum ne ai 'shaukat'

palaT ke aa gae hum phir unhin balaon tak