kali ke husn ko rang-e-shabab se bhar den

kalī ke husn ko rang-e-shabāb se bhar deñ

guloñ kī tishna-labī hai sharāb se bhar deñ

nasīm-e-sub.h chale shabnamī phuvār liye

diloñ ke baaġh ko rangīñ gulāb se bhar deñ

sunā rahā hai koī pyaar kā nayā naġhma

vafā kī bazm sadā-e-rabāb se bhar deñ

ye barhamī kisī gesū kī kab gavārā huī

chalo sañvār ke zulfeñ shahāb se bhar deñ

nazar na aa.e kahīñ se bhī nafratoñ kā varaq

kitāb-e-zīst mohabbat ke baab se bhar deñ

harīm-e-nāz gulistān-e-rang-o-bū ho sadā

tamām kūcha-e-jānāñ gulāb se bhar deñ

vo regzār ko dariyā batā rahe haiñ 'shakīl'

jo bas chale to samundar sharāb se bhar deñ

kali ke husn ko rang-e-shabab se bhar den

gulon ki tishna-labi hai sharab se bhar den

nasim-e-subh chale shabnami phuwar liye

dilon ke bagh ko rangin gulab se bhar den

suna raha hai koi pyar ka naya naghma

wafa ki bazm sada-e-rabab se bhar den

ye barhami kisi gesu ki kab gawara hui

chalo sanwar ke zulfen shahab se bhar den

nazar na aae kahin se bhi nafraton ka waraq

kitab-e-zist mohabbat ke bab se bhar den

harim-e-naz gulistan-e-rang-o-bu ho sada

tamam kucha-e-jaanan gulab se bhar den

wo regzar ko dariya bata rahe hain 'shakil'

jo bas chale to samundar sharab se bhar den