kam nahin hai ranj-o-gham mein ye KHushi mere liye

kam nahīñ hai ranj-o-ġham meñ ye ḳhushī mere liye

bādaloñ se jhāñktī hai chāñdnī mere liye

us kī āñkhoñ meñ namī hai muñh se kuchh kahtā nahīñ

ik aziyyat ban ga.ī hai ḳhāmushī mere liye

phir ġhalat-fahmī kī chingārī havā dene lagī

us ne likkhā hai ye ḳhat hai āḳhirī mere liye

raqs kartī hai mirī parchhā.īñ us kī yaad meñ

ab to jiinā ho gayā hai lāzmī mere liye

apne saare ḳhvāb sheroñ meñ sajā detī huuñ maiñ

bā.is-e-taskīn-e-dil hai shā.irī mere liye

barf ke mausam meñ bhī ghar se nikalnā qahr thā

jis taraf bhī maiñ ga.ī ik aag thī mere liye

raat añdherī aur maiñ tanhā musāfir ai 'sabā'

kis qadar mushkil huī hai zindagī mere liye

kam nahin hai ranj-o-gham mein ye KHushi mere liye

baadalon se jhankti hai chandni mere liye

us ki aankhon mein nami hai munh se kuchh kahta nahin

ek aziyyat ban gai hai KHamushi mere liye

phir ghalat-fahmi ki chingari hawa dene lagi

us ne likkha hai ye KHat hai aaKHiri mere liye

raqs karti hai meri parchhain us ki yaad mein

ab to jina ho gaya hai lazmi mere liye

apne sare KHwab sheron mein saja deti hun main

bais-e-taskin-e-dil hai shairi mere liye

barf ke mausam mein bhi ghar se nikalna qahr tha

jis taraf bhi main gai ek aag thi mere liye

raat andheri aur main tanha musafir ai 'saba'

kis qadar mushkil hui hai zindagi mere liye