kamal-e-ilm o tahqiq-e-mukammal ka ye hasil hai

kamāl-e-ilm o tahqīq-e-mukammal kā ye hāsil hai

tirā idrāk mushkil thā tirā idrāk mushkil hai

ye vīrānī tasavvur kī vo rañgīnī ḳhayāloñ kī

kabhī mahfil meñ ḳhalvat hai kabhī ḳhalvat meñ mahfil hai

vo ā.īna ho yā ho phuul taara ho ki paimāna

kahīñ jo kuchh bhī TuuTā maiñ yahī samjhā mirā dil hai

ujālā ho to DhūñDūñ dil bhī parvānoñ kī lāshoñ meñ

mirī barbādiyoñ ko intizār-e-sub.h-e-mahfil hai

vo dil le kar hameñ be-dil na samjheñ un se kah denā

jo haiñ maare hue nazroñ ke un kī har nazar dil hai

vo ai 'sīmāb' kyuuñ sargashta-e-tasnīm-o-jannat ho

mayassar jis ko sair-e-tāj hai jamunā kā sāhil hai

kamal-e-ilm o tahqiq-e-mukammal ka ye hasil hai

tera idrak mushkil tha tera idrak mushkil hai

ye virani tasawwur ki wo rangini KHayalon ki

kabhi mahfil mein KHalwat hai kabhi KHalwat mein mahfil hai

wo aaina ho ya ho phul tara ho ki paimana

kahin jo kuchh bhi TuTa main yahi samjha mera dil hai

ujala ho to DhunDun dil bhi parwanon ki lashon mein

meri barbaadiyon ko intizar-e-subh-e-mahfil hai

wo dil le kar hamein be-dil na samjhen un se kah dena

jo hain mare hue nazron ke un ki har nazar dil hai

wo ai 'simab' kyun sargashta-e-tasnim-o-jannat ho

mayassar jis ko sair-e-taj hai jamuna ka sahil hai