kamal-e-zauq-e-sajda is se baDh kar aur kya hoga

kamāl-e-zauq-e-sajda is se baḌh kar aur kyā hogā

vahīñ vo naqsh-e-pā ubhrā jahāñ rakh dī jabīñ maiñ ne

maiñ har ik ajnabī ko dekh kar mahsūs kartā huuñ

ki shāyad is ko dekhā hai kabhī pahle kahīñ maiñ ne

bashar kā hai bashar dushman ye kaisā daur hai yaaro

mohabbat kā chalan bilkul nahīñ dekhā kahīñ maiñ ne

mirī ik muskurāhaT par ye duniyā kyoñ bigaḌtī hai

ki muddat tak bahut aañsū bahā.e haiñ yahīñ maiñ ne

chaman meñ har taraf zāġh-o-zaġhan kā raaj hai 'lāġhar'

chaman meñ qumrī-o-bulbul nahīñ dekhī kahīñ maiñ ne

kamal-e-zauq-e-sajda is se baDh kar aur kya hoga

wahin wo naqsh-e-pa ubhra jahan rakh di jabin main ne

main har ek ajnabi ko dekh kar mahsus karta hun

ki shayad is ko dekha hai kabhi pahle kahin main ne

bashar ka hai bashar dushman ye kaisa daur hai yaro

mohabbat ka chalan bilkul nahin dekha kahin main ne

meri ek muskurahaT par ye duniya kyon bigaDti hai

ki muddat tak bahut aansu bahae hain yahin main ne

chaman mein har taraf zagh-o-zaghan ka raj hai 'laghar'

chaman mein qumri-o-bulbul nahin dekhi kahin main ne