kambaKHt dil ne ishq ko wahshat bana diya

kambaḳht dil ne ishq ko vahshat banā diyā

vahshat ko ham ne bā.is-e-rahmat banā diyā

kyā kyā muġhālate diye daur-e-jadīd ne

nafrat ko pyaar pyaar ko nafrat banā diyā

ham ne hazār fāsle jī kar tamām shab

ik muḳhtasar sī raat ko muddat banā diyā

ai jaan apne dil pe mujhe naaz kyuuñ na ho

ik ḳhvāb thā ki jis ko haqīqat banā diyā

maḳhsūs had pe aa ga.ī jab be-ruḳhī tirī

us had ko ham ne hāsil-e-qismat banā diyā

kambaKHt dil ne ishq ko wahshat bana diya

wahshat ko hum ne bais-e-rahmat bana diya

kya kya mughaalate diye daur-e-jadid ne

nafrat ko pyar pyar ko nafrat bana diya

hum ne hazar fasle ji kar tamam shab

ek muKHtasar si raat ko muddat bana diya

ai jaan apne dil pe mujhe naz kyun na ho

ek KHwab tha ki jis ko haqiqat bana diya

maKHsus had pe aa gai jab be-ruKHi teri

us had ko hum ne hasil-e-qismat bana diya