kami zara si agar fasle mein aa jae

kamī zarā sī agar fāsle meñ aa jaa.e

vo shaḳhs phir se mire rābte meñ aa jaa.e

use kured rahā huuñ tarah tarah se ki vo

jihat jihat se mire jā.eze meñ aa jaa.e

kamāl jab hai ki sañvre vo apne darpan meñ

aur us kā aks mire ā.īne meñ aa jaa.e

kiyā hai tark-e-ta.alluq to muḌ ke dekhnā kyā

kahīñ na farq tire faisle meñ aa jaa.e

dimāġh ahl-e-mohabbat kā saath detā nahīñ

use kaho ki vo dil ke kahe meñ aa jaa.e

vo merī raah meñ āñkheñ bichhā.e baiThā ho

ye vāqi.a bhī kabhī dekhne meñ aa jaa.e

vo māhtāb-e-zamāna hai log kahte haiñ

to us kā nuur mire shab-kade meñ aa jaa.e

bas ik 'farāġh' bachā hai junūñ-pasand yahāñ

kaho ki vo bhī mire qāfile meñ aa jaa.e

kami zara si agar fasle mein aa jae

wo shaKHs phir se mere rabte mein aa jae

use kured raha hun tarah tarah se ki wo

jihat jihat se mere jaeze mein aa jae

kamal jab hai ki sanwre wo apne darpan mein

aur us ka aks mere aaine mein aa jae

kiya hai tark-e-talluq to muD ke dekhna kya

kahin na farq tere faisle mein aa jae

dimagh ahl-e-mohabbat ka sath deta nahin

use kaho ki wo dil ke kahe mein aa jae

wo meri rah mein aankhen bichhae baiTha ho

ye waqia bhi kabhi dekhne mein aa jae

wo mahtab-e-zamana hai log kahte hain

to us ka nur mere shab-kade mein aa jae

bas ek 'faragh' bacha hai junun-pasand yahan

kaho ki wo bhi mere qafile mein aa jae