kar ke asir-e-ghamza-o-naz-o-ada mujhe

kar ke asīr-e-ġhamza-o-nāz-o-adā mujhe

ai dil-navāz tū ne ye kyā de diyā mujhe

jaanā thā itnī jald to aayā thā kis liye

ek ek pal hai hijr kā sabr-āzmā mujhe

bujhne lagī hai sham-e-shabistān-e-ārzū

ab sūjhtā nahīñ hai koī rāstā mujhe

āñkheñ thiiñ farsh-e-rāh tumhāre liye sadā

tum aas paas ho yahīñ aisā lagā mujhe

ye dard-e-dil hai mere liye ab vabāl-e-jāñ

miltā nahīñ kahīñ koī dard-āshnā mujhe

kashti-e-dil kā sauñp diyā jis ko nazm-o-nasq

detā rahā fareb vahī nāḳhudā mujhe

rahzan se baḌh ke us kā ravayya thā mere saath

pahlī nigāh meñ jo lagā rahnumā mujhe

ab maiñ huuñ aur ḳhvāb-e-pareshāñ hai mere saath

kitnā paḌegā aur abhī jāgnā mujhe

kyā ye junūn-e-shauq gunāh-e-azīm hai

kis jurm kī milī hai ye āḳhir sazā mujhe

'barqī' na ho udaas sar-e-rahguzar hai vo

paiġhām de ga.ī hai ye bād-e-sabā mujhe

kar ke asir-e-ghamza-o-naz-o-ada mujhe

ai dil-nawaz tu ne ye kya de diya mujhe

jaana tha itni jald to aaya tha kis liye

ek ek pal hai hijr ka sabr-azma mujhe

bujhne lagi hai sham-e-shabistan-e-arzu

ab sujhta nahin hai koi rasta mujhe

aankhen thin farsh-e-rah tumhaare liye sada

tum aas pas ho yahin aisa laga mujhe

ye dard-e-dil hai mere liye ab wabaal-e-jaan

milta nahin kahin koi dard-ashna mujhe

kashti-e-dil ka saunp diya jis ko nazm-o-nasq

deta raha fareb wahi naKHuda mujhe

rahzan se baDh ke us ka rawayya tha mere sath

pahli nigah mein jo laga rahnuma mujhe

ab main hun aur KHwab-e-pareshan hai mere sath

kitna paDega aur abhi jagna mujhe

kya ye junun-e-shauq gunah-e-azim hai

kis jurm ki mili hai ye aaKHir saza mujhe

'barqi' na ho udas sar-e-rahguzar hai wo

paigham de gai hai ye baad-e-saba mujhe