kar ke bimar di dawa tu ne

kar ke bīmār dī davā tū ne

jaan se pahle dil liyā tū ne

rah-rav-e-tishna-lab na ghabrānā

ab liyā chashma-e-baqā tū ne

shaiḳh jab dil hī dair meñ na lagā

aa ke masjid se kyā liyā tū ne

duur ho ai dil-e-ma.āl andesh

kho diyā umr kā mazā tū ne

ek begāna vaar kar ke nigāh

kyā kiyā chashm-e-āshnā tū ne

dil o diiñ kho ke aa.e the sū-e-dair

yaañ bhī sab kuchh diyā ḳhudā tū ne

ḳhush hai ummīd-e-ḳhuld par 'hālī'

koī pūchhe ki kyā kiyā tū ne

kar ke bimar di dawa tu ne

jaan se pahle dil liya tu ne

rah-raw-e-tishna-lab na ghabrana

ab liya chashma-e-baqa tu ne

shaiKH jab dil hi dair mein na laga

aa ke masjid se kya liya tu ne

dur ho ai dil-e-maal andesh

kho diya umr ka maza tu ne

ek begana war kar ke nigah

kya kiya chashm-e-ashna tu ne

dil o din kho ke aae the su-e-dair

yan bhi sab kuchh diya KHuda tu ne

KHush hai ummid-e-KHuld par 'haali'

koi puchhe ki kya kiya tu ne