karan karan nazar mein meri har taraf sahab tha

karāñ karāñ nazar meñ merī har taraf sahāb thā

zamīñ rahī ye tishna-lab kahīñ magar na aab thā

badal chuke haiñ sab mire dil-o-nazar ke zāviye

nazar paḌī thī us kī ik ajiib inqalāb thā

ki naqsh dil pe ho ga.ī hai qurbatoñ kī dāstāñ

mahak rahī hai yāsmīñ khilā huā gulāb thā

shadīd abr-o-bād thī vo zehn-o-dil ke darmiyāñ

badan-zamīn ġharq thī lahū meñ iztirāb thā

nazar ke qīl-o-qāl meñ ye falsafe kī baat kyā

maiñ sar-ba-sar savāl thā sarāpā vo javāb thā

ki gurg meñ badal ga.e vo jitne mere yaar the

shaġhāl jāñ-nisār the ajiib merā ḳhvāb thā

ye zindagī 'nadīm' jī tazād kī hai dāstāñ

ki matmah us kā aur thā jo merā intiḳhāb thā

karan karan nazar mein meri har taraf sahab tha

zamin rahi ye tishna-lab kahin magar na aab tha

badal chuke hain sab mere dil-o-nazar ke zawiye

nazar paDi thi us ki ek ajib inqalab tha

ki naqsh dil pe ho gai hai qurbaton ki dastan

mahak rahi hai yasmin khila hua gulab tha

shadid abr-o-baad thi wo zehn-o-dil ke darmiyan

badan-zamin gharq thi lahu mein iztirab tha

nazar ke qil-o-qal mein ye falsafe ki baat kya

main sar-ba-sar sawal tha sarapa wo jawab tha

ki gurg mein badal gae wo jitne mere yar the

shaghaal jaan-nisar the ajib mera KHwab tha

ye zindagi 'nadim' ji tazad ki hai dastan

ki matmah us ka aur tha jo mera intiKHab tha