karam ba-nam-e-sitam us pe be-hisab hua

karam ba-nām-e-sitam us pe be-hisāb huā

jo luT gayā rah-e-ulfat meñ kāmyāb huā

nazar nazar ne pinhāyā libās-e-tār-e-nazar

pas-e-naqāb huā jo bhī be-naqāb huā

vo sarfarāz huā kārobār-e-ulfat meñ

barā-e-mashq-e-jafā jis kā intiḳhāb huā

na zindagī ne qubūlā na maut ne pūchhā

ḳharāb-hāl zamāna bahut ḳharāb huā

utar ga.e jo kisī kī hañsī ke sadqe meñ

un āñsuoñ kā huā to kahāñ hisāb huā

ye kyā ki apnī bhī pahchān ho ga.ī mushkil

bil-āḳhir apnī nigāhoñ se bhī hijāb huā

utar sakā jo kharā vaqt kī kasauTī par

ma.āl-e-kār vo zarra bhī āftāb huā

dil-o-nazar kī bahāroñ ke ruḳh palaTte hī

'rishī' gulāb kā chehra bhī aab aab huā

karam ba-nam-e-sitam us pe be-hisab hua

jo luT gaya rah-e-ulfat mein kaamyab hua

nazar nazar ne pinhaya libas-e-tar-e-nazar

pas-e-naqab hua jo bhi be-naqab hua

wo sarfaraaz hua karobar-e-ulfat mein

bara-e-mashq-e-jafa jis ka intiKHab hua

na zindagi ne qubula na maut ne puchha

KHarab-haal zamana bahut KHarab hua

utar gae jo kisi ki hansi ke sadqe mein

un aansuon ka hua to kahan hisab hua

ye kya ki apni bhi pahchan ho gai mushkil

bil-aKHir apni nigahon se bhi hijab hua

utar saka jo khara waqt ki kasauTi par

maal-e-kar wo zarra bhi aaftab hua

dil-o-nazar ki bahaaron ke ruKH palaTte hi

'rishi' gulab ka chehra bhi aab aab hua