karam hua bhi to kitne takallufat ke baad

karam huā bhī to kitne takallufāt ke baa'd

'atā huā ġham-e-jānāñ ġham-e-hayāt ke baa'd

tire sitam kī qayāmat bhī dil pe guzrī hai

tirī nigāh-e-'ināyat ke hādsāt ke baa'd

nazar nazar tirā jalva nafas nafas ḳhushbū

'ajīb haal hai tark-e-ta'alluqāt ke baa'd

ḳhud apnī shakl nazar aa.ī un kī sūrat meñ

nazar uThī jo hijāb-e-ta’yyunāt ke baa'd

kahīñ milā na vo saaya ki dil Thahar jaatā

tumhāre ġham kī kaḌī dhuup se najāt ke baa'd

ye raushnī unhīñ tārīkiyoñ se phūTī hai

yaqīn dil ko milā hai tavahhumāt ke baa'd

huī hai 'badr' unheñ zahmat-e-taġhāful bhī

magar mire dil-e-pāmāl-e-iltifāt ke baa'd

karam hua bhi to kitne takallufat ke ba'd

'ata hua gham-e-jaanan gham-e-hayat ke ba'd

tere sitam ki qayamat bhi dil pe guzri hai

teri nigah-e-'inayat ke hadsat ke ba'd

nazar nazar tera jalwa nafas nafas KHushbu

'ajib haal hai tark-e-ta'alluqat ke ba'd

KHud apni shakl nazar aai un ki surat mein

nazar uThi jo hijab-e-ta’yyunat ke ba'd

kahin mila na wo saya ki dil Thahar jata

tumhaare gham ki kaDi dhup se najat ke ba'd

ye raushni unhin tarikiyon se phuTi hai

yaqin dil ko mila hai tawahhumat ke ba'd

hui hai 'badr' unhen zahmat-e-taghaful bhi

magar mere dil-e-pamal-e-iltifat ke ba'd