karega kya koi mere gale-saDe aansu

karegā kyā koī mere gale-saḌe aañsū

to kyuuñ na suukh hī jaa.eñ paḌe paḌe aañsū

jo yaad aa.eñ to dil ġham se phaTne lagtā hai

kisī aziiz kī palkoñ meñ vo jaḌe aañsū

huā maiñ apnī tahī-dāmanī se sharminda

kisī kī āñkhoñ meñ the ye baḌe baḌe aañsū

ḳhizāñ meñ patte bhī aise kahāñ jhaḌe hoñge

hamārī āñkhoñ se juuñ hijr meñ jhaḌe aañsū

maiñ is ḳhayāl se jaate hue use na milā

ki rok leñ na kahīñ sāmne khaḌe aañsū

kisī ne ek taraf mar ke bhī gila na kiyā

kisī ne dekhte hī dekhte ghaḌe aañsū

mahārat aisī ki bas dekhte hī rah jaao

nikāltā hai koī yuuñ khaḌe khaḌe aañsū

tumheñ kahā nā ki bas ho ga.e judā ham log

ukhāḌte ho miyāñ kis liye gaḌe aañsū

magar jo zabt ne tūfāñ khaḌe kiye ab ke!!

tamām umr bahāyā kiye baḌe aañsū

ajab gudāz tabī.at hai aap kī 'javvād'

zarā sī baat huī aur chhalak paḌe aañsū

karega kya koi mere gale-saDe aansu

to kyun na sukh hi jaen paDe paDe aansu

jo yaad aaen to dil gham se phaTne lagta hai

kisi aziz ki palkon mein wo jaDe aansu

hua main apni tahi-damani se sharminda

kisi ki aankhon mein the ye baDe baDe aansu

KHizan mein patte bhi aise kahan jhaDe honge

hamari aankhon se jun hijr mein jhaDe aansu

main is KHayal se jate hue use na mila

ki rok len na kahin samne khaDe aansu

kisi ne ek taraf mar ke bhi gila na kiya

kisi ne dekhte hi dekhte ghaDe aansu

mahaarat aisi ki bas dekhte hi rah jao

nikalta hai koi yun khaDe khaDe aansu

tumhein kaha na ki bas ho gae juda hum log

ukhaDte ho miyan kis liye gaDe aansu

magar jo zabt ne tufan khaDe kiye ab ke!!

tamam umr bahaya kiye baDe aansu

ajab gudaz tabiat hai aap ki 'jawwad'

zara si baat hui aur chhalak paDe aansu