karen na yaad shab-e-hadisa hua so hua

kareñ na yaad shab-e-hādisa huā so huā

bhulā deñ aao har ik vāqi.a huā so huā

burā huā ki laḌe jāñ-nisār aapas meñ

burā hai aur bhī ye tazkira huā so huā

ġhazab huā ki na.e log aa base dil meñ

bichhaḌnā un se alag sāneha huā so huā

kahāñ kahāñ se na aafat kī āñdhiyāñ aa.iiñ

dayār-e-qalb meñ jo zalzale huā so huā

bahut se kāñTe gire phuul ban ke dāman meñ

guloñ kī zaat se jo fā.eda huā so huā

pahan ke dost bhī nikle libās-e-tanz 'hasan'

vo apnī aan meñ be-qā.ida huā so huā

karen na yaad shab-e-hadisa hua so hua

bhula den aao har ek waqia hua so hua

bura hua ki laDe jaan-nisar aapas mein

bura hai aur bhi ye tazkira hua so hua

ghazab hua ki nae log aa base dil mein

bichhaDna un se alag saneha hua so hua

kahan kahan se na aafat ki aandhiyan aain

dayar-e-qalb mein jo zalzale hua so hua

bahut se kanTe gire phul ban ke daman mein

gulon ki zat se jo faeda hua so hua

pahan ke dost bhi nikle libas-e-tanz 'hasan'

wo apni aan mein be-qaida hua so hua