karenge qasd hum jis dam tumhaare ghar mein aawenge

kareñge qasd ham jis dam tumhāre ghar meñ āveñge

jo hogī umr bhar kī raah to dam bhar meñ āveñge

agar hāthoñ se us shīrīñ-adā ke zab.h hoñge ham

to sharbat ke se ghūñT āb-e-dam-e-ḳhanjar meñ āveñge

yahī gar josh-e-girya hai to bah kar saath ashkoñ ke

hazāroñ pāra-e-dil mere chashm-e-tar meñ āveñge

gar is qaid-e-balā se ab kī chhūTeñge to phir hargiz

na ham dām-e-fareb-e-shoḳh-e-ġhārat-gar meñ āveñge

na jaate garche mar jaate jo ham mālūm kar jaate

ki itnā tañg jā kar kūcha-e-dilbar meñ āveñge

garebāñ-chāk lākhoñ haath se us mehr-e-tal.at ke

ba-rañg-e-sub.h-e-mahshar arsa-e-mahshar meñ āveñge

jo sargardānī apnī tere dīvāne dikhā.eñge

to phir kyā kyā bagūle dasht ke chakkar meñ āveñge

'zafar' apnā karishma gar dikhāyā chashm-e-sāqī ne

tamāshe jām-e-jam ke sab nazar sāġhar meñ āveñge

karenge qasd hum jis dam tumhaare ghar mein aawenge

jo hogi umr bhar ki rah to dam bhar mein aawenge

agar hathon se us shirin-ada ke zabh honge hum

to sharbat ke se ghunT aab-e-dam-e-KHanjar mein aawenge

yahi gar josh-e-girya hai to bah kar sath ashkon ke

hazaron para-e-dil mere chashm-e-tar mein aawenge

gar is qaid-e-bala se ab ki chhuTenge to phir hargiz

na hum dam-e-fareb-e-shoKH-e-ghaarat-gar mein aawenge

na jate garche mar jate jo hum malum kar jate

ki itna tang ja kar kucha-e-dilbar mein aawenge

gareban-chaak lakhon hath se us mehr-e-talat ke

ba-rang-e-subh-e-mahshar arsa-e-mahshar mein aawenge

jo sargardani apni tere diwane dikhaenge

to phir kya kya bagule dasht ke chakkar mein aawenge

'zafar' apna karishma gar dikhaya chashm-e-saqi ne

tamashe jam-e-jam ke sab nazar saghar mein aawenge