karishma kya na hua baat kaun si na hui

karishma kyā na huā baat kaun sī na huī

magar charāġh tale raushnī kabhī na huī

koī bhī chuul to sīdhī nahīñ milī us kī

tirā mizāj huā bīsvīñ sadī na huī

vo pyaas thī ki ham apnā lahū bhī pī jaate

ye ittifāq thā us samt fikr hī na huī

jo kaam haath meñ ham ne liyā sire na chaḌhā

jo baat soch ke tum hans diye kabhī na huī

salām-e-shauq har ik raat kī zabān pe thā

sharīk-e-hāl magar koī raat bhī na huī

nigal gayā use merā mizāj-e-tīra-shabī

vo chāñd hī thā magar us se chāñdnī na huī

us āḳhirī tag-o-dau kā bhī hashr dekh liyā

ḳhushī se mil ke bhī 'hairat' koī ḳhushī na huī

karishma kya na hua baat kaun si na hui

magar charagh tale raushni kabhi na hui

koi bhi chul to sidhi nahin mili us ki

tera mizaj hua biswin sadi na hui

wo pyas thi ki hum apna lahu bhi pi jate

ye ittifaq tha us samt fikr hi na hui

jo kaam hath mein hum ne liya sire na chaDha

jo baat soch ke tum hans diye kabhi na hui

salam-e-shauq har ek raat ki zaban pe tha

sharik-e-haal magar koi raat bhi na hui

nigal gaya use mera mizaj-e-tira-shabi

wo chand hi tha magar us se chandni na hui

us aaKHiri tag-o-dau ka bhi hashr dekh liya

KHushi se mil ke bhi 'hairat' koi KHushi na hui