karne do agar qattal-e-jahan talwar ki baaten karte hain

karne do agar qattāl-e-jahāñ talvār kī bāteñ karte haiñ

arzāñ nahīñ hotā un kā lahū jo pyaar kī bāteñ karte haiñ

ye aish-o-tarab ke matvāle be-kār kī bāteñ karte haiñ

paa.el ke ġhamoñ kā ilm nahīñ jhankār kī bāteñ karte haiñ

nā-haq hai havas ke bandoñ ko nazzāra-e-fitrat kā da.avā

āñkhoñ meñ nahīñ hai bīnā.ī dīdār kī bāteñ karte haiñ

ġham meñ bhī rahā ehsās-e-tarab dekho to hamārī nādānī

vīrāne meñ saarī umr kaTī gulzār kī bāteñ karte haiñ

be-naqd-e-amal jannat kī talab kyā shai haiñ janāb-e-vā.iz bhī

muTThī meñ nahīñ haiñ dām-o-diram bāzār kī bāteñ karte haiñ

kahte haiñ unhīñ ko dushman-e-dil hai naam usī kā nāseh bhī

vo log jo rah kar sāhil par mañjdhār kī bāteñ karte haiñ

pahuñche haiñ jo apnī manzil par un ko to nahīñ kuchh nāz-e-safar

chalne kā jinheñ maqdūr nahīñ raftār kī bāteñ karte haiñ

ye ahl-e-qalam ye ahl-e-hunar dekho to 'shakīl' in sab ke jigar

fāqoñ se haiñ dil murjhā.e sū-e-dār kī bāteñ karte haiñ

karne do agar qattal-e-jahan talwar ki baaten karte hain

arzan nahin hota un ka lahu jo pyar ki baaten karte hain

ye aish-o-tarab ke matwale be-kar ki baaten karte hain

pael ke ghamon ka ilm nahin jhankar ki baaten karte hain

na-haq hai hawas ke bandon ko nazzara-e-fitrat ka dawa

aankhon mein nahin hai binai didar ki baaten karte hain

gham mein bhi raha ehsas-e-tarab dekho to hamari nadani

virane mein sari umr kaTi gulzar ki baaten karte hain

be-naqd-e-amal jannat ki talab kya shai hain janab-e-waiz bhi

muTThi mein nahin hain dam-o-diram bazar ki baaten karte hain

kahte hain unhin ko dushman-e-dil hai nam usi ka naseh bhi

wo log jo rah kar sahil par manjdhaar ki baaten karte hain

pahunche hain jo apni manzil par un ko to nahin kuchh naz-e-safar

chalne ka jinhen maqdur nahin raftar ki baaten karte hain

ye ahl-e-qalam ye ahl-e-hunar dekho to 'shakil' in sab ke jigar

faqon se hain dil murjhae su-e-dar ki baaten karte hain