karo jo chaho humse puchhna kya

karo jo chāho ham se pūchhnā kyā

hamārī aarzū kyā mudda.ā kyā

samajh kā pher hai achchhā burā sab

jo sach pūchho to achchhā kyā burā kyā

kareñ sajda faqat ham bahr-sajda

nahīñ manzūr banda kyā ḳhudā kyā

jise mil jaa.e tere ġham kī daulat

ġham-e-duniyā se us ko vāsta kyā

aizzah kyuuñ sar-e-bālīñ haiñ ḳhāmosh

marīz-e-ġham abhī se so gayā kyā

mare jaate haiñ ham ḳhauf-e-fanā se

na ho marnā to jiine meñ burā kyā

na jaane aaj kyuuñ bigḌe hue ho

kisī ne kaan meñ kuchh kah diyā kyā

na jiinā haath meñ apne na marnā

bashar kī ibtidā kyā intihā kyā

sitam dekho mujhī se pūchhte haiñ

nasīb-e-dushmanāñ kuchh ho gayā kyā

hamārā kaam hai ghuT ghuT ke marnā

vahī jaane jafā kyā hai vafā kyā

sar-e-mimbar koī jā kar to dekhe

abhī tak hai dar-e-mai-ḳhāna vā kyā

vo vaqt-e-sub.h ruḳhsat ho rahe haiñ

yahī hai shām-e-ġham kī ibtidā kyā

but-e-kāfir se ulfat hai 'sahar' ko

vahī jaane ki but kyā hai ḳhudā kyā

karo jo chaho hum se puchhna kya

hamari aarzu kya muddaa kya

samajh ka pher hai achchha bura sab

jo sach puchho to achchha kya bura kya

karen sajda faqat hum bahr-sajda

nahin manzur banda kya KHuda kya

jise mil jae tere gham ki daulat

gham-e-duniya se us ko wasta kya

aizzah kyun sar-e-baalin hain KHamosh

mariz-e-gham abhi se so gaya kya

mare jate hain hum KHauf-e-fana se

na ho marna to jine mein bura kya

na jaane aaj kyun bigDe hue ho

kisi ne kan mein kuchh kah diya kya

na jina hath mein apne na marna

bashar ki ibtida kya intiha kya

sitam dekho mujhi se puchhte hain

nasib-e-dushmanan kuchh ho gaya kya

hamara kaam hai ghuT ghuT ke marna

wahi jaane jafa kya hai wafa kya

sar-e-mimbar koi ja kar to dekhe

abhi tak hai dar-e-mai-KHana wa kya

wo waqt-e-subh ruKHsat ho rahe hain

yahi hai sham-e-gham ki ibtida kya

but-e-kafir se ulfat hai 'sahar' ko

wahi jaane ki but kya hai KHuda kya