karta hai koi aur bhi girya mere dil mein

kartā hai koī aur bhī girya mire dil meñ

rahtā hai koī aur bhī mujh sā mire dil meñ

vo mil gayā phir bhī ye lagātār udāsī

shāyad hai koī aur bhī dhaḌkā mire dil meñ

ik rañj meñ Duubā huā be-nām musāfir

aayā thā baḌī duur se Thahrā mire dil meñ

jis shaam ko bhūle hue ik umr huī thī

chamkā hai usī shaam kā taarā mire dil meñ

ik huuk sī uThtī hai sar-e-bām-e-tamannā

vo merī ḳhushī se kabhī rahtā mire dil meñ

aa.e haiñ yahāñ tak to chalo us se bhī mil leñ

ye dhyān bhī ik baar to aayā mire dil meñ

jis aag ko kahte haiñ qayāmat se nahīñ kam

bahtā hai usī aag kā dariyā mire dil meñ

karta hai koi aur bhi girya mere dil mein

rahta hai koi aur bhi mujh sa mere dil mein

wo mil gaya phir bhi ye lagatar udasi

shayad hai koi aur bhi dhaDka mere dil mein

ek ranj mein Duba hua be-nam musafir

aaya tha baDi dur se Thahra mere dil mein

jis sham ko bhule hue ek umr hui thi

chamka hai usi sham ka tara mere dil mein

ek huk si uThti hai sar-e-baam-e-tamanna

wo meri KHushi se kabhi rahta mere dil mein

aae hain yahan tak to chalo us se bhi mil len

ye dhyan bhi ek bar to aaya mere dil mein

jis aag ko kahte hain qayamat se nahin kam

bahta hai usi aag ka dariya mere dil mein