karta main ab kisi se koi iltimas kya

kartā maiñ ab kisī se koī iltimās kyā

marne kā ġham nahīñ hai to jiine kī aas kyā

jab tujh ko mujh se duur hī rahnā pasand hai

saa.e kī tarah rahtā hai phir ās-pās kyā

tujh se bichhaḌ ke ham to yahī sochte rahe

ye gardish-e-hayāt na aa.egī raas kyā

ab tark-e-dostī hī taqāzā hai vaqt kā

terā qayās gar hai yahī to qayās kyā

maanā ki terā milnā hai mushkil bahut magar

har lamha TuuT jaa.e ab aisī bhī aas kyā

ik umr ho ga.ī hai yahī sochte hue

apnī kitāb-e-zīst kā hai iqtibās kyā

'nādir' kahīñ to sair ko bāhar bhī jā.iye

har-dam kisī kī yaad meñ rahnā udaas kyā

karta main ab kisi se koi iltimas kya

marne ka gham nahin hai to jine ki aas kya

jab tujh ko mujh se dur hi rahna pasand hai

sae ki tarah rahta hai phir aas-pas kya

tujh se bichhaD ke hum to yahi sochte rahe

ye gardish-e-hayat na aaegi ras kya

ab tark-e-dosti hi taqaza hai waqt ka

tera qayas gar hai yahi to qayas kya

mana ki tera milna hai mushkil bahut magar

har lamha TuT jae ab aisi bhi aas kya

ek umr ho gai hai yahi sochte hue

apni kitab-e-zist ka hai iqtibas kya

'nadir' kahin to sair ko bahar bhi jaiye

har-dam kisi ki yaad mein rahna udas kya