karte hain chain baiThe husn-o-jamal wale

karte haiñ chain baiThe husn-o-jamāl vaale

phirte haiñ maare maare kyā kyā kamāl vaale

merī tarah se ek din bāzār se jahāñ ke

jāveñge haath ḳhālī jitne haiñ taal vaale

dam de ke phāñstā hai ushshāq ke dinoñ ko

maiñ jāntā huuñ tujh ko zulfoñ ke jaal vaale

mahshar kā ma.arka ho jis dam jahāñ ke andar

us din hameñ bachānā o lambī Dhaal vaale

bulbul haiñ tere ham bhī bāġh-e-jahāñ ke andar

o gul se gaal vaale sumbul se baal vaale

tanhā lahad ke andar hoñge gadā kī sūrat

jitne haiñ is jahāñ meñ jāh-o-jalāl vaale

zulf-e-shab-e-judā.ī terī burī balā hai

is kā ḳhayāl rakhnā o lambe baal vaale

āshiq haiñ ham bhī tere abrū ke aur ruḳh ke

ham ko bhī yaad rakhnā badr-o-hilāl vaale

bhūle haiñ do-jahāñ ko sud-bud nahīñ kisī kī

jo jo haiñ is jahāñ meñ tere ḳhayāl vaale

sayyād ne bichhāyā gulshan meñ dām-o-dāna

sun gul-ezār vaale o ḳhatt-o-ḳhāl vaale

merī tarah se ik din bāzār se jahāñ ke

jā.eñge haath ḳhālī jitne haiñ maal vaale

mansūr-o-qais-o-vāmiq farhād-o-'muntahī' se

kyā kyā ga.e jahāñ se fazl-o-kamāl vaale

karte hain chain baiThe husn-o-jamal wale

phirte hain mare mare kya kya kamal wale

meri tarah se ek din bazar se jahan ke

jawenge hath KHali jitne hain tal wale

dam de ke phansta hai ushshaq ke dinon ko

main jaanta hun tujh ko zulfon ke jal wale

mahshar ka marka ho jis dam jahan ke andar

us din hamein bachana o lambi Dhaal wale

bulbul hain tere hum bhi bagh-e-jahan ke andar

o gul se gal wale sumbul se baal wale

tanha lahad ke andar honge gada ki surat

jitne hain is jahan mein jah-o-jalal wale

zulf-e-shab-e-judai teri buri bala hai

is ka KHayal rakhna o lambe baal wale

aashiq hain hum bhi tere abru ke aur ruKH ke

hum ko bhi yaad rakhna badr-o-hilal wale

bhule hain do-jahan ko sud-bud nahin kisi ki

jo jo hain is jahan mein tere KHayal wale

sayyaad ne bichhaya gulshan mein dam-o-dana

sun gul-ezar wale o KHatt-o-KHal wale

meri tarah se ek din bazar se jahan ke

jaenge hath KHali jitne hain mal wale

mansur-o-qais-o-wamiq farhad-o-'muntahi' se

kya kya gae jahan se fazl-o-kamal wale