karte hain shauq-e-did mein baaten hawa se hum

karte haiñ shauq-e-dīd meñ bāteñ havā se ham

jaate haiñ kū-e-yār meñ pahle sabā se ham

pīchhe kahīñ rahe nahīñ āh-e-rasā se ham

jaate haiñ kū-e-yār meñ pahle sabā se ham

iizā kī apnī fikr kareñge davā se ham

DhūñDeñge koī maut kā nusḳha shifā se ham

zāhid burā na māneñge is bad-duā se ham

hoñ but-parast chāhte haiñ ye ḳhudā se ham

uljheñge ek baar to zulf-e-dotā se ham

saudā.ī huuñ saḌī huuñ tumhārī balā se ham

teġh-e-nigah na tīr-e-mizha ne kiyā halāk

haañ mar ga.e haiñ aap hī apnī qazā se ham

nā-qadr se hī qadr kī ummīd hai abas

o be-vafā ḳhajil hue apnī vafā se ham

ghar jā ke un ke rog lagā laa.e ishq kā

bīmār ho ke aa.e haiñ dārushshifā se ham

āb-e-hayāt ḳhizr-o-sikandar ko chāhiye

saaqī faqat sharāb ke haiñ ik piyā se ham

bole masīh dekh ke bīmār-e-ishq ko

majbūr haiñ isī maraz-e-lā-davā se ham

jhelī huī haiñ ishq meñ lākhoñ musībateñ

Darte nahīñ hai aap ke jaur-o-jafā se ham

ghar meñ huzūr ke hameñ sonā nasīb ho

aa.e haiñ maal mārne daulat-sarā se ham

gulzār hai shahīdoñ kā jannat kā ham-savād

jā.eñge to na ā.eñge phir karbalā se ham

qismat kā apnī pech huā gesūoñ kā pech

badleñ siyāh tāle-e-zill-e-humā se ham

dil meñ tire asar na huā arsh hil gayā

nādim haiñ nā-rasā.ī-e-āh-e-rasā se ham

achchhā huā na dafn huī na.ash ba.ad-e-marg

kyā musht-e-ustuḳhvāñ ko chhupāte humā se ham

sote nahīñ haiñ raat ko bhī ham to chain se

karte haiñ 'mehr' uns jo ik mah-laqā se ham

karte hain shauq-e-did mein baaten hawa se hum

jate hain ku-e-yar mein pahle saba se hum

pichhe kahin rahe nahin aah-e-rasa se hum

jate hain ku-e-yar mein pahle saba se hum

iza ki apni fikr karenge dawa se hum

DhunDenge koi maut ka nusKHa shifa se hum

zahid bura na manenge is bad-dua se hum

hon but-parast chahte hain ye KHuda se hum

uljhenge ek bar to zulf-e-dota se hum

saudai hun saDi hun tumhaari bala se hum

tegh-e-nigah na tir-e-mizha ne kiya halak

han mar gae hain aap hi apni qaza se hum

na-qadr se hi qadr ki ummid hai abas

o be-wafa KHajil hue apni wafa se hum

ghar ja ke un ke rog laga lae ishq ka

bimar ho ke aae hain darushshifa se hum

aab-e-hayat KHizr-o-sikandar ko chahiye

saqi faqat sharab ke hain ek piya se hum

bole masih dekh ke bimar-e-ishq ko

majbur hain isi maraz-e-la-dawa se hum

jheli hui hain ishq mein lakhon musibaten

Darte nahin hai aap ke jaur-o-jafa se hum

ghar mein huzur ke hamein sona nasib ho

aae hain mal marne daulat-sara se hum

gulzar hai shahidon ka jannat ka ham-sawad

jaenge to na aaenge phir karbala se hum

qismat ka apni pech hua gesuon ka pech

badlen siyah tale-e-zill-e-huma se hum

dil mein tere asar na hua arsh hil gaya

nadim hain na-rasai-e-ah-e-rasa se hum

achchha hua na dafn hui nash baad-e-marg

kya musht-e-ustuKHwan ko chhupate huma se hum

sote nahin hain raat ko bhi hum to chain se

karte hain 'mehr' uns jo ek mah-laqa se hum