karte rahe taaqub-e-ayyam umr-bhar

karte rahe ta.āqub-e-ayyām umr-bhar

uḌtā rahā ġhubār bahar-gām umr-bhar

hasrat se dekhte rahe har ḳhush-ḳhirām ko

ham sūrt-e-tuyyur tah-e-dām umr-bhar

har-chand talḳh-kām thā har jur.a-e-hayāt

muñh se lagā.e baiThe rahe jaam umr-bhar

har shāḳh-e-nau-bahār thī ālūda-e-ġhubār

DhūñDā kiye nasheman-e-ārām umr-bhar

kuchh kaam aa sakīñ na yahāñ be-gunāhiyāñ

ham par lagā huā thā vo ilzām umr-bhar

detā rahā sadā.eñ hameñ duur duur tak

koī chhupā huā pas-e-asnām umr-bhar

bā-vasf-e-ehtiyāt 'tamannā.ī' ham rahe

pā-basta-e-salāsil-e-auhām umr-bhar

karte rahe taaqub-e-ayyam umr-bhar

uDta raha ghubar bahar-gam umr-bhar

hasrat se dekhte rahe har KHush-KHiram ko

hum surt-e-tuyyur tah-e-dam umr-bhar

har-chand talKH-kaam tha har jura-e-hayat

munh se lagae baiThe rahe jam umr-bhar

har shaKH-e-nau-bahaar thi aaluda-e-ghubar

DhunDa kiye nasheman-e-aram umr-bhar

kuchh kaam aa sakin na yahan be-gunahiyan

hum par laga hua tha wo ilzam umr-bhar

deta raha sadaen hamein dur dur tak

koi chhupa hua pas-e-asnam umr-bhar

ba-wasf-e-ehtiyat 'tamannai' hum rahe

pa-basta-e-salasil-e-auham umr-bhar