karti hai mujhe qatl mere yar ki raftar

kartī hai mujhe qatl mire yaar kī raftār

talvār kī talvār hai raftār kī raftār

kaj aisī na thī aage mire yaar kī raftār

sīkhā hai magar charḳh-e-sitam-gār kī raftār

sar girte haiñ kaT kaT ke vo rakhtā hai jahāñ paañv

sīkhī hai magar yaar ne talvār kī raftār

gardish hai tirī nargis-e-bīmār ko din-rāt

dekhī nahīñ aisī kisī bīmār kī raftār

Taltī nahīñ zulfoñ ke tasavvur kī tarah se

hai turfa judā.ī kī shab-e-tār kī raftār

laġhzish na ho kyuuñ kar rah-e-dīñ meñ mujhe zāhid

yaad aa ga.ī us kāfir-e-mai-ḳhvār kī raftār

zālim tire kūche se qadam uTh nahīñ saktā

kyuuñ kar na chalūñ sāya-e-dīvār kī raftār

kyā maar ko nisbat tire gesū ke chalan se

hai sāya-e-gesū meñ sanam maar kī raftār

motī evaz-e-naqsh-e-qadam girte haiñ 'nāsiḳh'

aisī hai mirī kilk-e-guhar-bār kī raftār

karti hai mujhe qatl mere yar ki raftar

talwar ki talwar hai raftar ki raftar

kaj aisi na thi aage mere yar ki raftar

sikha hai magar charKH-e-sitam-gar ki raftar

sar girte hain kaT kaT ke wo rakhta hai jahan panw

sikhi hai magar yar ne talwar ki raftar

gardish hai teri nargis-e-bimar ko din-raat

dekhi nahin aisi kisi bimar ki raftar

Talti nahin zulfon ke tasawwur ki tarah se

hai turfa judai ki shab-e-tar ki raftar

laghzish na ho kyun kar rah-e-din mein mujhe zahid

yaad aa gai us kafir-e-mai-KHwar ki raftar

zalim tere kuche se qadam uTh nahin sakta

kyun kar na chalun saya-e-diwar ki raftar

kya mar ko nisbat tere gesu ke chalan se

hai saya-e-gesu mein sanam mar ki raftar

moti ewaz-e-naqsh-e-qadam girte hain 'nasiKH'

aisi hai meri kilk-e-guhar-bar ki raftar